Nordlándda KS ja Romssa ja Finnmárkku KS oktasaš fylkkačoahkkimis bođii ovdan oaivil ahte berre jođánit stuoridit Davvi-Norgga fápmobuvttadeami.
– Go Nordlándda KS:s ja Romssa ja Finnmárkku KS:s boahtá oktasaš dieđáhus, de lea dat fámolaš diehtu mii olles regiovnnas boahtá, ja dan ferte duođalažžan atnit, dadja Eirik Losnegaard Mevik, guhte lea sihke KS Romssa ja Finnmárkku fylkkastivrra stivralahttu ja Návuona sátnejođiheaddji.
Fylkkačoahkkimis lea digaštallon sihke Davvi-Norgga fápmodilálašvuođa ja dearvvašvuođafálaldagaid birra.
Energiijagilvu
– Davvi-Norggas lea ovdal leamašan ovdamunni go lea gilvovuoimmalaš olahanmuddu ráinnas energiijai. Dál ges vásihit muhtun davviregiovnnat ahte fertejit hilgut gánnáhahtti doaimmaid, go váilu bargokapasitehta, lohká Mevik.
Fylkkačoahkkima lahtut sávvet ahte ráđđehus buktá ollislaš plána mii guoská Davvi-Norgga fápmobuvttadeapmái. Sii vurdet de ahte stáhta buktá ođđa veahkkeneavvuid maiguin sáhttet suohkaniid fárus čoavdit boahttevaš energiijahástalusaid davvin.
Hástalusaide gáibiduvvo alla gelbbolašvuohta
Dieđáhusas oaivvildit ahte Norgii ihtet olu hástalusat boahtteáiggis. Go de čuožžilit hástalusat mat gusket birasrievdadusaide ja servodatsihkarvuhtii, de gáibiduvvo alit dássi sihke doaibmannávccas ja gelbbolašvuođas vai daid sáhttet čoavdit.
Sii jáhkket ahte dat sáhttá leat stuora hástalussan smávva suohkaniidda.
– Mii oaivvildit ahte sihkarvuođapolitihka dili vuođul ferte Finnmárkui láhčit buori ássandili, lohká Mevik.
