Suoma dearvvašvuođainstituhtta THL dieđiha ahte measta 7 proseantta buot ássiin Lappi guovllus leat boahkuhuvvon.
Dat dagaha ahte Lappis leat nu boahkuhan eanemus olbmuid olles Suomas. Dán vahku vurdojuvvojit boahkuhit vel eanet.
Eanet go 10 400 olbmo leat ožžon vuosttas koronaboahkuid. Ja fas eanet go 2000 olbmo leat boahkuhuvvon nuppes. 117 205 olbmo ásset Lappi guovllus.
Roavvenjárggas lea maid gávdnon brihttalaš koronadávda guoktásis. Sudnos lea čanastat Ruoŧa Skielleha báhtterfabrihkkii.
– Leavvanfárta dagaha fuola, ahte dat sáhttá leavvat jođánit ja lasihit buohcceviesu bargonoađi, dadjá bajit infekšuvdnadoavttir Markku Broas Yle Sápmái. Broas muitala, ahte dál birrasiid 150 olbmo leat erremis. Oktiibuot 30 suopmelačča leat buohccán Skielleha báhtterfabrihkas covid-19-dávdii.
– Lohku sáhttá vel rievdat, muhto buohkat, geat leat njoammunáitaga vuolde, leat dál erremis.
Lappi guovllus leat gávnnahan maŋemus guovtti vahkus 36 njoammuma. Ja Länsi-Pohja guovllus maid 36 njoammuma.
