Norrbottena leanas leat alimus jápminlogut mirkogeavaheddjiid gaskkas olles Ruoŧas maŋemus jagi. Oktiibuot leat 31 jápmán leanas.
Maŋemus njealji jagis leat eanemus olbmot jápman narkotihkkageavaheami dihte Norrbottena leanas, čájehit logut. Diibmá jápme 22 olbmo Norrbottenis, 2020:s 16 olbmo ja jagi 2019 jápme 18 olbmo mirkkuid geažil.
Dán jagi lea ođđa olahus, go oktiibuot 31 olbmo leat jápmán go leat dáhtolaččat dehe dáhtokeahttá váldán badjelmearálaččat narkotihka.
Ruoŧa álbmotdearvvašvuođa guorahalli Mimmi Eriksson deattuha ahte lea váttis dadjat manin Norrbottenis leat nu olusat jápmán.
– Mis leat beare unnán dieđut báikkálaš erohusaid birra, muhto sáhttet leat máŋga siva dasa. Mii diehtit ahte Davvi-Ruoŧas ostet olu narkotihka neahta bakte. Dat sáhtta leat sivvan manin olusat jápmet, cealká son preassadieđáhusa bakte.
