Birasdirektoráhtta rahpá vejolašvuođa njeaidit čieža guovžža olles Noggas, hehtten dihte boahttevaš vahágiid guohtunealáhusaide, nu movt šibitdollui ja boazodollui.
Birasdirektoráhtta rahpá vejolašvuođa njeaidit čieža guovžža olles Noggas, hehtten dihte boahttevaš vahágiid guohtunealáhusaide, nu movt šibitdollui ja boazodollui.
Oktiibuot sáhttet čieža guovžža goddot dán jagáš liseansabivddus mii álgá dán mánu 21. beaivvi. Birasdirektoráhtta rahpá vejolašvuođa njeaidit guovžžaid, hehtten dihte boahttevaš vahágiid šibihiidda ja bohccuide, vaikko diibmá eai olahan nállemihtu mii guoská guvžii.
Earit leat juhkkojuvvon dáinnalágiin:
Ovtta guovžža Hedemárkkus
Guokte guovžža Trøndelágas ja Møre ja Romsdálas.
Ovtta guovžža Nordlánddas
Golbma guovžža Finnmárkkus ja Romssas.
Reaidu mainna geahpidit vahágiid
Birasdirektoráhtta árvvoštallá ahte njeaidit čieža guovžža ii váikkut guovžanáli ceavzimii nu sakka. Birasdirektoráhta sekšuvdnajođiheaddji Knut Morten Vangen lohká liseansabivdu lea reaidu mainna geahpedit guođohanealáhusaid vahátviidodaga ja dagahit dan eanet einnostahttin.
– Doaibma lea jurddašuvvon njeaidit varisguovžžaid vuoruhuvvon guohtoneatnamiin, ja báikkiin gos lea liseansabivdu mat leat olggobealde mearriduvvon čivganguovlluid. Danne lea vejolašvuohta hui unni ahte njiŋŋelas guovžžat báhččojit, lohká son.
Ii nu álki oažžut lobi
Boraspirešiehtadusas boahtá maiddái ovdan ahte guohtungeavaheapmi galgá heivehuvvot eastadeaddji doaimmaiguin vuoruhuvvon boraspireguovlluin. Dat mearkkaša ahte boraspiret leat vuoruhuvvon dáin guovlluin, ja oažžut lobi báhčit boraspiriid doppe ii leat nu álki.
Ii dábálaš bivdu
Liseansabivdu addá lobi njeaidit dihto boraspire vissis loguin fuođđolága mielde. Liseansabivdu ii leat dábálaš bivdu, muhto biddjo johtui go boraspire vahágahttá šibihiid dahje bohccuid. Eari mearridit almmolaš eiseválddir, ja searvat liseansabivdui gáibiduvvo ahte bivdi lea registrerejuvvon liseansabivdin Bivdoregistaris.
Olles ášši sáhtát lohkat Birasdirektoráhta siidduin.
