Ráđđehus duppalastá ruhtajuolludeami árktalaš eanadollui vai borramušbuvttadeapmi lassánivčče.
Davvi-Norgga boanddat galggaše buvttadit eanet borramuša, ja danin lasiha ráđđehus ruhtadeami árktalaš eanadollui dán jagi eanadoallošiehtadusa bokte.
Davvi-Norgga eanadollui lea hástaleaddji buvttadit biepmu dálkkádaga geažil, ja danin lasihit eiseválddit juolludeami 2 miljovnnas 4 miljovnna ruvdnui.
– Mis galgá eanadoallu miehtá Norgga ja iešguđetge guovlluin fertejit hutkat ja gávnnahit man láhkai lea buoremusat buvttadit biepmu dálkkádaga ektui, dadjá eanadoallo- ja biebmoministtar Olaug Bollestad preassadieđáhusas.
Čalmmustahttet Davvi-Norgga buktagiid
Davvi-Norgga eanadoalloráđi NIBIO dutkanprošeakta čohkke dieđuid árktalaš borramušbuvttadeami birra, ja dat galgá vuođđun lasihit buvttadeami guovllus.
Prošeavtta bokte lea maid ulbmilin merket gálvvuid mat buvttaduvvojit davvin.
– Davvi-Norgga erenoamáš dálkkádat hástala guovllu borramušbuvttadeami, muhto seammás šaddá borramužžii áibbas erenoamáš smáhkka, go buvttaduvvo guovllus gos lea čuovgat ja čoaskkis. Oaivvildan ahte leat stuora vejolašvuođat lasihit buvttadeami ja árvvu dán borramušas. Danin galgá ruhtadeapmi boahtit buorrin boanddaide ja sii galget dán bokte oažžut vejolašvuođa oahppat eanet borramušbuvttadeami birra iežaset guovllus, dadjá Bollestad.
