Badjelaš 900 sarvvain, ealggain ja bohccuin leat iskan CWD-dávdda Nordlánddas, Romssas ja Finnmárkkus. Dál dieđihit ahte ii leat gávdnon vuoiŋŋamašdávda iskojuvvon elliin Davvi-Norggas.
Badjelaš 900 sarvvain, ealggain ja bohccuin leat iskan CWD-dávdda Nordlánddas, Romssas ja Finnmárkkus. Dál dieđihit ahte ii leat gávdnon vuoiŋŋamašdávda iskojuvvon elliin Davvi-Norggas.
– Buot iskosat ledje negatiiva, ja mii leat hui ilus dan dihte, muitala Davviguovllu Biebmobearráigeahču fágaráđđeaddi Anne Døsen.
Iskkadeamit
Romssa, Málatvuomi, Beardu, Leaŋgáviika, Ráisavuona, Divrrát, Siellatgielda ja Loabát suohkanat leat Romssas mielde iskkadeamis. Lassin lea Árborde, Vápste ja Gála suohkanat Nordlánddas mielde elliid iskosis.
Namuhuvvon suohkaniin leat 600 vuoiŋŋamašiskosat váldon, vuosttaš gávcci bivdobeaivvis. Bivdiid ledje ávžžuhan searvat kártemii, ja buktit sarvaoivviid iskosiidda.
Kurssaid lágidan
Buot suohkaniin miehtá Norgga galget iskat buot sarvvaid, ealggaid ja bohccuid mat leat gávdnon jápmán, roasmmohuvvan dahje vuojáhallan. Biebmobearráigeahčču lea čađahan kurssaid movt galgá váldit iskosiid vuoiŋŋamaččain, ja muitala ahte lea leamaš stuora beroštupmi sis geat ledje oahppame iskosiid váldit. Ledje sihke ovdalaš bivdit, boazodoallit, fuođđoovddasvástideaddjit, bivdosearvvit, bivdit ja olbmot geain lea beroštupmi leat mielde kártenbarggus.
– Mii giitit buohkaid geat leat veahkehan vai beasaimet oahpahit 140 olbmo váldit dákkár iskosiid Davvi-Norggas, muitala Anne Døsen, ja muitala ahte leat juohkán dieđuid buot orohagaide, ja sávvet ahte dieđut leat ollen.
– Lea hirbmat ollu bargu biddjon dása. Ollugat leat boahtán kurssaide ja diehtojuohkinčoahkkimiidda. Bivdit leat veahkehan čohkket 600 iskosa daid vuosttaš gávcci beaivvi bivddus, muitala Døsen.
Ávžžuhit dieđihit
Dán rádjái leat 200 dábálaččat njuvvon bohcco, ja badjel 90 vuojáhallan, jápmán ja buohcci/roasmmohuvvan ealggat, sarvvat ja bohccot iskojuvvon, ii ge leat gávdnon dávda sis. Biebmobearráigeahčču joatká váldit iskosiid njuvvojuvvon bohccuin, ja elliin mat jápmet.
– Mii muittuhit ahte jus oainnát sarvva, ealgga dahje bohcco mii orro hui guoirras, vázzá stáđismeahttumit ja ártegit, dahje geassáda luottaid guvlui, ii ge bala olbmuin, de fertet dieđihit Biebmobearráigehččui, muitala Anne Døsen. (©NTB)
