SINTEF dieđiha ođasdoaimmahaga ntb.no bokte ahte Davvi-Norgga FOU-ovttasbargu SkiferSolid prošeavttain álggahit barggu mo beaktilabbot sáhtášii ávkkástallat báikkálaš ráktogeđggiid. FOU lea Forskning og utviklingsarbeid dahje dutkan ja ovdánahttinbargu. SINTEF lea FOU ovttasbargoguoibmi. Sivva dán ovttasbargui lea ahte Norga geavaha ráktogeđggiid šiljuide miljárdda kruvnna ovddas jahkásaččat ja dát ráktogeđggiid oastin olgoriikkain lea lassánan badjel beliin 15 jagis. Davvi-Norgga FOU-ovttasbargu SkiferSolid lea ráhkadit rávvagiid mo beavttálmahtášii báikkálaš ráktogeđggiid geavaheami. Ulbmil livččii oažžut eanet olbmuid válljet Álttá ráktogeađggi šilljogeađgin.
Álttás lea máilmmi stuorámus registrerejuvvon kvártsaráktogeađgi. SINTEF dutkanhoavda Lisbeth-Ingrid Alnæs lohká ahte ráktogeađgi lea min kulturárbi, vižžon lagaš birrasis, birasustitlaš ja nana molssaeaktu mas lea guhkes buvttadan- ja geavahanárbevierru. Jahkásaččat geavahit Norgga gávpotgielddat birrasii 150 000 njealjádasmehtera granihta ja 20 000 njealjádasmehtera ráktogeađggi šiljuide. Norgga huksejeaddjit, entreprenevrrat, neavvut ja arkiteavttat sávašedje Norga geavahit eanet Norgga ráktogeđggiid sihke almmolaš ja priváhta bargguin. Dattetge válljejit Norggas hálbbit molssaeavttu nu go Kiinná granihta.
– Dehálaš ulbmil dán prošeavttas lea duođaštit Álttá ráktogeađggi iešvuođaid ja rávvet mo dan sáhtášii geavahit, nu ahte šattašii vierrun válljet Álttá ráktogeađggi šilljui, lohká SINTEF prošeaktajođiheaddji Lisbeth-Ingrid Alnæs.
SkiferSolid bargu lea ge dutkat Álttá ráktogeađggi ávnnaslaš iešvuođaid, gos dan sáhtášii geavahit ja maid dat gierdá dálkki, johtolaga, geavaheami ja bistilvuođa ektui. Dasa lassin maiddái goluid ja birrasa ektui. Dát buvttašii lasi arvoháhkama ja gávppašandoaimmaid.
