-Almmuhus-
OĐĐASATDavvi-norgalaččat máksán 41 miljárdda ruvnno vearu

Davvi-norgalaččat máksán 41 miljárdda ruvnno vearu

-

-

Vearrosisaboahtu jagi 2015 ovddas čájeha ahte Davvi-Norgga álbmot mávssii sullii 41 miljárdda ruvnno vearu. Dat lea 2,7 miljárdda lassáneapmi ovddit jagi ektui.

Odne gárvánii maŋemus vearrosisaboahtu jagi 2015 ovddas. Ollislaččat leat 385 000 bargoolbmo, penšunisttat ja persovnnalaš ealáhusdoaimmaheaddjit Davvi-Norggas máksán 37 miljárdda ruvnno vearu stáhtii.

Juohke bargi máksá gaskamearálaččat 101 000 ruvnno. Dasa lassin leat 23 400 Davvi-Norgga fitnodagat máksán measta njeallje miljárdda ruvnno ovddas vearu. Dat lea gaskamearálaččat sullii 170 000 ruvnno juohke fitnodagas.

– Vearromáksin čavčča mielde lea maŋemus jagiid dagahan ahte eai leat nu ollugat geat dárbbašit vuordit gitta golggotmánu 1. beaivvi rádjái ovdal go ožžot vearrodieđuid, muitala Skatt nord bagadusa ossodatjođiheaddji Helge Aune.

 

Buorrin vearru dahje lassi vearru

299 898 vearromáksi davvin leat ožžon 3,6 miljárdda vearroruđa ruovttoluotta. 66 897 vearromáksi šaddet máksit 1,4 miljárdda lassin. Gaskamearálaš supmi maid leat ožžon ruovttoluotta lea 12 155 ruvnno, ja gaskamearálaš supmi maid šaddet máksit lassin lea 21 094 ruvnno.

 

Geahča iežat suohkana loguid dás.

 

Ihttin beasat oaidnit listtuid

Ihttin, bearjadaga golggotmánu 14.beaivvi, almmuhuvvojit vearrolisttut skatteetaten.no siiddus. Jus áiggut ohcat namaid vearrolisttuin, de fertet MinID bokte logget sisa. Leat dušše diimmá vearrolisttut main sáhtát ohcat namaid.

Sáhtát maid oaidnit geat du nama leat ohcan vearrolisttuin. Don gávnnat statistihka mas čuožžu dan olbmo namma, riegádanjahki, poastanummár ja orrunbáiki gii lea du nama ohcan listtuin.

 

Dás oainnát sámi suohkaniid galli olbmui guoská vearromáksin ja man ollu vearrosisaboahtu juohke suohkanis boahtá stáhtii.

Sámi suohkan Gallásii guoská vearromáksin Man ollu vearrosisaboahtu
Guovdageaidnu 2 232 145,1 Mill kr
Kárášjohka 2 131 157,7 Mill kr
Deatnu 2 404 190,1 Mill kr
Porsáŋgu 3 197 262,6 Mill kr
Unjárga 748 52,6 Mill kr
Gáivuotna 1 714 120,0 Mill kr
Loabát 784 61,6 Mill kr
Divtasvuodna 1 680 137,7 Mill kr
Raarvihke 396 31,7 Mill kr
Snåase 1 729 136,7 Mill kr
Oktiibuot 17 015 1 295,8 Mill kr

 

-Almmuhus-