Otná rájes ii dárbbaš erremii jus boahtá fiskes guovllus Suomas Norgii.
Norga rahpá ráji Suoma guovlluide gos lea unnán njoammun miessemánu 27. beaivvi rájes dieđiha Yle Sápmi. Norga meroštallá Suoma guovlluid fiskadin dehe ruoksadin koronanjoammundili jelgii.
Fiskes dássái šaddet dat guovllut gos lea unnit njoammun go 25 njoammuma 100 000 ássi ektui guovtti vahku áiggis.
Dál leat dát guovllut Suomas fiskes dásis: Lappi guovlu, Kainuu, Gaska-Pohjanmaa, Davvi-Pohjanmaa, Mátta-Pohjanmaa, Mátta-Savo, Nuorta-Savo, Davvi-Gárjil, Mátta-Gárjil, Vaasa ja Ålánda.
Eará guovllu ássiide Suomas leat errengáibádusat go áigot Norgii. Lea ain eahpesihkar mot galgá duođaštit ahte boahtá fiskes guovllus Norgii, čállá Yle Sápmi.
