Dávgevári njoarostangilvui eai leat nu olusat dieđihuvvon go ovddit jagiid lávejit. Lágideaddjit leat maid šaddan rievdadusaid dahkat gilvvus, go njoarostanšillju áin lea muohttaga vuolde.
Dávgevári njoarostangilvui eai leat nu olusat dieđihuvvon go ovddit jagiid lávejit. Lágideaddjit leat maid šaddan rievdadusaid dahkat gilvvus, go njoarostanšillju áin lea muohttaga vuolde.
Dán vahkkoloahpa lea Taiga-festivála Dávgeváris Suomabeale Sámis. Dán jagi lágiduvvo maid suohpangiehta gilvu, muhto das leat soames rievdadeamit.
Šillju gos dábálaččat lágidit gilvvu lea áin muohttaga vuolde, ja šadde rievdadit čielga njoarostangilvvus kombinašuvdnagilvui.
Báhčingilvu lassin
Lassin njoarosteapmái lea dán jagi láserbissu báhčin. Lávvordaga lea njoarostangilvu ja sotnabeaivvi fas báhčingilvu. Oktasaš bohtosiid vuođul rátkojuvvojit gávcci buoremusat finálii mii lea sotnabeaivvi. Dalle galget dat gávcci oassálastit gahčahangilvvus.
Dasto lea vuosttaš vuoitun 800 euro, nubbi vuoitu 300 euro ja goalmmát vuoitu 200 euro. Buot oassálastiid gaskkas vuorbáduvvo vel jacuzzi lávgungárri.
– Dán jagi lea ruhtavuoitu go eat vuordán nu olu oasseváldiid, dálkki ja olu muohttaga dihtii. Lea maid leamaš váttis doalahit buriid sponsoriid go eat vuordde nu olu olbmuid. Sávan boahtte jahkái váldit oktavuođa Norggabeale sponsoriiguin go lea leamaš stuora beroštupmi dan beale Sámi. Sávvamis oažžut fas ATV vuosttaš vuoitun, lohká gilvvu jođiheaddji Teemu Kuukasjärvi.
Lágideaddjit eai vuordde lihka olu oasseváldiid dán jagi go ovddit jagiid leat leamaš. Eai leat vuos eará riikkain nu oallugat dieđihan gilvui.
Gilvu dollo dán jagi Nugget boradanbáikki olggobealde, gos maid konsearta lágiduvvo.
Duppalvuoiti ii soaitte asttat
Nils Máhtte Rognerud Eira vuittii njoarostangilvvu diibmá ja ovddit jagi, muhto dán jagi ii soaitte asttat vuolgit bealuštit iežas tihttela.
Son lea geassebarggus Deanočázadaga guolástanhálddašeamis johkabearráigeahččin, ja sus lea bargu vahkkoloahpas.
– In soaitte dán jagi beassat, vaikke lea álo somá geahččalit fámuid ja searaid. Lea álo somá gilvalit, lohká Eira.
Ovddit jagiid lea vuoitu leamaš njealjejuvllatsihkkel. Eira lea guokte sihkkela vuoitán, muhto lohká 800 euro maid livčče buorre vuoitu. Dat mii su eanaš geasuha lea gilvu, ii ge vuoitu.
Erenoamážit geasuha Taigafestivála gilvu, Eira rámpo lágideddjiid ja lohká sii nagodit ráhkadit gilvvu gelddolažžan sihke oasseváldiide ja gehččiide.
– Norgga ja Suomabeale njoarostangilvvut leat olu seamma, galgá čoarvvi njoarostit, ja murdit maŋŋelii, ja lea vel áigi. Dávgeváris revolušonerejit gilvvu, sii ráhkadit beroštumi gilvui. Doppe lea lihkadeaddji njoarostangilvu, ja dat lea gelddolaš, somá go nagodit ođasmahttit gilvvu, lohká Eira.
Eira mielas lea maid somá vuolgit Dávgevárrái go doppe deaivvada olu oahppásiiguin geaid muđui ii šatta deaivat.
Vuovdán vuoittuid
Njealjejuvllagiid maid Eira diibmá ja ovddit jagi vuittii, son lea vuovdán.
– Mun dihten ovdalgihtii ahte ii leat vuogas vuoittuid vuovdit. Danne mun jerren áhčis go vuiten, heive go vuovdit. Son čilgii ahte nu guhká go mun lean ieš váikkuhan vuitui, iežan searaiguin vuoitán, de ii gahča dan seamma kategoriijai ja danne mun vuvden sihkkeliid. In gille muitalit geaidda lean vuovdán, muhto goappaš sihkkelat leat mannan badjedillái, ja leat ovtta láhkái mannan ávkin boazodillái, lohká Eira.
Konsearta geasuha
Lávvordaga eahkes lea maid konsearta Taigafestiválas. Čođđu, Azis the Bieggaváibmu, Ravggon ja Kevin Boine galget čuojahit.
Lágideaddjit čilgejit ahte leat measta geargan ráhkkanemiiguin, ja festivála lea ožžon olu fuomášumi Láppis.
– Lávvordaga konsearta leat min bivnnuheamos doalut dán jagi, lohká lágideaddji.
