-Almmuhus-
-Almmuhus-
OĐĐASAT – Dat pande­miija lea čáje­han máilbmái mo mii sáhttit rievdat

– Dat pande­miija lea čáje­han máilbmái mo mii sáhttit rievdat

-

-

Sámiráđđi ávžžuha globála rievdadusaid:

COVID-19 ealáskahttindoaimmain, Sámiráđđi ávžžuha buot ráđđehusaid, riikkaidgaskasaš lágádusaid ja fitnodagaid gudneáŋgiris rievdadusaide čuovvovaš 30 jagis.

– Galget leat suvdilis ja ruoná rievdadusat, mat máhcahit min dillái, gos fas eallit goaritkeahttá luonddubirrasis. Muđui mis lea ovddabealde heahtedilli, man bálddas covid-19 pandemiija orru fal smávva hehttehus, dadjá Sámiráđi presideanta Christina Henriksen preassadieđáhusas.

Fuolas eamiálbmogiid váikkuhusaide

Sámiráđđi lea fuolas covid-19 dávdda váikkuhusain eamiálbmogiidda, go olu eamiálbmotservošiin miehtá máilmmi leat váilevaš vejolašvuođat beassat buori dikšui. Eiseválddit fertejit vuoruhit dan dili buorideami, dain riikkain gos eamiálbmogat orrot. Vaikko covid-19 oidnojuvvo eanaš dearvvašvuođaheahtin, de lea dat maid čájehan dehálaš áššiid olles servodagas.

– Dat pandemiija lea čájehan máilbmái mo mii sáhttit rievdat, go oaidnit hohpolaš dárbbu. Buohkat mii juogadit ovddasvástádusa, muhto earenomážit máilmmi jođiheaddjit ja fitnodagat galget stivregoahtit min suvdilis boahtteáiggi guvlui, dadjá presideanta.

Árvvus atnit

Sámiráđđi lea fuolas ahte ealáskahttindoaimmaiguin máilbmi máhccá fas oanehisáigge jurddašanvuohkái, mii vuođđuduvvo luonddubirrasa goarideapmái.

– Eamiálbmogiid jurddašanvuogi mielde dalle go váldá juoidá, ferte maid addit ruovttoluotta. Ferte geahččat guhkás boahtteáigái ja árvvus atnit dan, mo buot eallin lea čadnon oktii. Dál, eanet go goassige ovdal, mii fertet loktet dan viisodaga, dadjá Henriksen.

Birra máilmmi váikkuhusat

Henriksen oaivvilda ahte ovdal eat sáhttán jurddašitge dan maid dál leat dahkan – gidden ekonomiijaid pandemiija njoammuma dihtii. Birra máilmmi oidnojit dát váikkuhusat: buhttásut čázit gos mearraeallit mannet guovlluide, gos eai leat ovdal oidnon; buhttásut áimmu geažil várrečohkat oidnojit čuđiid kilomehteriid duohkái, gosa eai ovdal oidnon; stuorragávpogat besset návddašit buhttásut áimmu go girdi- ja biilajohtolaga nuoskkideapmi lea geahppánan.

– Dát leat dat jođánis váikkuhusat, maid olbmo čalmmiiguin oaidnit. Mii sáhttit fal govahallat, makkár oaidnemeahttun váikkuhusat das leat, go luonddubiras beassá bosihit, loahpaha son.

- Advertisement -
-Almmuhus-