-Almmuhus-
GUOIMMUHEAPMI– Dát lei heahpat

– Dát lei heahpat

-

-

Álggos leat golbma gažaldaga, jus daid máhtát, de manat viidáseappot gilvvus.

 

Namma: Ánde Trosten
Ahki: 25
Guovlu: Deatnu
Bargu: Sadjásaš oahpaheaddji

Geassegilvu:

Dán gilvvus lea mihttu čoaggit čuoggáid. 

 

Álgovuorus leat 3 gažaldaga, jus daid vástida riekta de manná viidáseappot. Juohke rievttes vástádusas oažžu 1 čuoggá. Jurddašanáigi: 20 sekundda.

 

De álget liigegažaldagat maid galgá vástidit 10 sekunddas. Liigegažaldagain oažžu 1 dahje 3 čuoggá, dan mielde makkár ivnni vállje; rukses dahje alit. Rukses gažaldagat leat váddáseappot. Gilvaleaddji manná viidáseappot nu guhká go vástida riekta liigegažaldagaid. 

 

Jus ii vástit áigemearrái, de manaha čuoggá.

 

Juohke gilvaleaddji beassá vel geahččalit vástidit ovtta árvalusa mainna sáhttá oažžut 5, 10 dahje 15 čuoggá, dan mielde makkár ivnni vállje; rukses, alit dahje ruoná. Rukses árvalus lea váddáseamos ja jus dan máhttá, de oažžu 15 čuoggá. Alit árvalusain oažžu 10 čuoggá ja ruoná árvalusain 5 čuoggá.Árvádusaid smiehttanáigi lea 1 minuhta.

 

Buohkat geat leat mielde Ávvira geassegilvvus ožžot Flax-vuorbbi. Dat gii nagoda čohkket eanemus čuoggáid vuoitá iPad-mini.

 

Juohke gilvaleaddji beassá hástalit ođđa gilvaleaddji Ávvira geassegilvui.

 

Ávvira bargit ja sin bearrašat eai sáhte searvat gilvui. 

 

Gilvoáigodat 01.07.15-15.8.15.

 

1. Guhte dáin lea máilmmi stuorámus jávri:  

A: Titicaca-mearra 

Á: Káspiamearra 

B: Baikaljávri

– Mun vástidan Baikaljávri.  BOASTUT!

Rievttes vástádus: Káspiamearra.

 

 

2. Guđe riikkas ráhkadit «Mazda»  nammasaš biillaid?

– Mun dajan Frankriikkas. BOASTUT!

Rievttes vástádus: Japánas

 

 

3. Makkár bohcco gohčodit suhkkesoaivin? 

– Pass. BOASTUT!

Rievttes vástádus: Dakkára mas leat hui ­suhkkes čoarvvit, čorvviin leat olu suorggit.

 

 

Go Trosten ii vástidan riekta buot golbma vuosttaš gažaldaga, de son ii mannan viidáset gilvvus. Son dattetge beassá geahččalit vástidit árvalusa mainna sáhttá fasket 5, 10 dahje 15 čuoggá. Dát lea dan duohken guđe ivnni vállje. Rukses árvalus lea váddáseamos, ja jus dan vástida riekta de oažžu 15 čuoggá, alit árvalusas faske 10 čuoggá ja ruonás ges 5 čuoggá.

Trosten vállje rukses ivnni ja mii jearrat sus dán árvalusa:

Mii lea dát: Dat lea dego gearpmaš mii manná čađa vuovddi, ja seaibi maŋis golgá?

– Rieban.  BOASTUT!

Rievttes vástádus: Áibmi, suotna maŋis.

 

– Dát gal lei heahpat, lohká Trosten.

 

Galle čuoggá oktiibuot: 0 čuoggá

 

Juohke gilvaleaddji beassá hástalit ođđa gilvaleaddji Ávvira geassegilvui, Trosten háliida hástalit Lasse Wigeliusa searvat Ávvira geassegilvui.

 

Njunnošis Ávvira geassegilvvus dál: Lemet Ánde Stueng 16 čuoggáin

-Almmuhus-