Olgešbellodaga válgagohccimis lei guhká jaskat otná eahkeda, muhto go buot jienat ledje lohkkon de gal champagnekoarka girddii áibmui.
– Mii diđiimet ahte šaddá garra válgagižžu, Doarespolitihkalaš listu (DpL), lea dahkan buori barggu boaittebeale giliin, dasa lassin válljiimet heaittihit skuvllaid ja dat diehttelasat leat váikkuhan válggaide. Muhto midjiide lea leamaš dehálaš čalmmustahttit dán árrat vai jienasteaddjit dihtet. Dál oaidnit ahte eat ráŋggáštuva dan ovddas, jus buot logut leat riekta de leat mii stuorámus bellodat Porsáŋggus, dadjá Jonas Sørum Nymo, maŋŋil go Porsáŋggu jienat ledje lohkkon.
Olgešbellodat faskii 34,6 proseantta jienain ja oažžu 7 áirasa gielddastivrii. Bargiidbellodat ges lea nubbin stuorámus bellodat 31, 6 proseanttain ja guđain áirasiin gielddastivrii, nu masse sii ovtta áirasa 2011 válggaid ektui.
– Midjiide lea ain luohttámuš, dál lea ain olu bargu ja šiehtadallamat ja de beassat oaidnit makkár gielddastivra lea boahttevaš njeallje jagi.
– Leago dis sátnejođiheaddji boahtte njeallje jagi?
– Dan ii sáhte oktage vástidit vuos, nu guhká go Bargiidbellodat eai leat vel čielggadan iežaset sávaldagaid. Mis ii leat borgárlaš eanetlohkku dáppe.
Geahpádus
Nymo lohká bohtosiid leat geahpádussan.
– Mun lohken ahte unnit go čieža áirasa lea heittot. Go bisuhit čieža de lean hui duđavaš, lohká Nymo.
Áirasat gielddastivrii:
Olgeš 7
Bb 6 (-1)
DpL 3 (+3)
SG 1
GB 1
Ovddádusbellodat 1 (-2)
