Cuoŋománu 16.beaivvi mearriduvvui Sámi girkolaš válgačoahkkin ásahuvvot, mii galgá čoahkkanit juohke njealját jagi ovdal girkoválggaid.
Cuoŋománu 16.beaivvi mearriduvvui Sámi girkolaš válgačoahkkin ásahuvvot, mii galgá čoahkkanit juohke njealját jagi ovdal girkoválggaid.
Válgačoahkkin galgá válljet sámi ovddasteddjiid Davvi-Hålogalándda ja Lulli-Hålogalándda bismmagodderáđiide, ja nammadit miellahtuid Sámi girkoráđđái.
Válljejit iežaset ovddasteddjiid
– Dát lea illubeaivi. Dat lea guhkes lávki girkodemokratiija barggus. Válgačoahkkin vástida sámiid iešmearrideami ja mielmearrideami rievtti válljet iežaset ovddasteddjiid mearrideaddji orgánaide Norgga girkus, lohká Sámi girkoráđi jođiheaddji Sara Ellen Anne Eira Norgga girku preassadieđáhusas.
Eira válljejuvvui girkoráđi čoahkkimis Troandimis joatkit jođiheaddjin vel guokte jagi.
Besset váikkuhit mearrádusaid
Sámi girkolaš válgačoahkkin ásahuvvui dan dihte go sámi ovddasteddjiid válgaortnet ii doaibman doarvái bures demokráhtalaččat dahje praktihkalaččat.
Válgačoahkkima ásaheapmi lea oassi sámi girkoeallima strategiijaplánas, mas mihttu lea ahte sámi girkoeallin galgá leat eleš ja seammaárvosaš.
– Válgačoahkkin lea sámi girkoeallima deaivvadanbáiki Norggas, gos sihke searvegotti bargit, eaktodáhtolaččat ja earát deaivvadit. Čoahkkin sáhttá buktit cealkámušaid áššiide mat gullet sámi girkoeallimii, lohká Eira.
Vuosttaš girkolaš válgačoahkkin lágiduvvo vuosttaš geardde 2019:s, ovdal Girkoválggaid.
Bismma nammadeami jienastit
Norgga girku mearridii maid ahte Sámi girkoráđđi galgá maid beassat jienastit go nammadit bismmaid sihke Davvi-Hålogalánddas, Lulli-Hålogalánddas, Nidarosas, Hamaris, Møres ja Oslo bismmagottiin.
Sámi girkoráđđi ásahuvvui 1992:s. Sámi válgačoahkkima bargu álggahuvvui 2010:s, ja jagi maŋŋel mearridii Girkoráđđi ođđa strategiijaplána sámi girkoeallimii.
