Norgga Boazosápmelaččaid Riikkasearvvi jođiheaddji Ellinor Marita Jåma ii hirpmástuva go gullá Ruobbá sullo dáhpáhusaid birra. — Mii diehtit dát dáhpáhuvvá, lea stuora servodat mii ii dieđe dáid áššiid birra, lohká son.
Norgga Boazosápmelaččaid Riikkasearvvi jođiheaddji Ellinor Marita Jåma ii hirpmástuva go gullá Ruobbá sullo dáhpáhusaid birra. — Mii diehtit dát dáhpáhuvvá, lea stuora servodat mii ii dieđe dáid áššiid birra, lohká son.
Čálus maid Randi A. Skum lea čállán bloggas lea leavvan viidát, ja boktán olu reakšuvnnaid.
Norgga Boazosápmelaččaid Riikkasearvvi (NBR) jođiheaddji Ellinor Marita Jåma dovdá olu sullásaš áššiid, ja rámiida čálli go lea juohkán dán muitalusa.
— Lea buorre go Randi A. Skum juohká dán muitalusa. Dás lea soames gii gulahallá njuolga boazodolliiguin, guhte muitala dán. Dát lea duohtavuohta ja olbmuid árgabeaivi. Mii oaidnit ahte dán maŋŋil leat boahtán sullásaš muitalusat ovdán, ja dat lea buorre, lohká NBR jođiheaddji Ellinor Marita Jåma.
Jåma ii hirpmástuva go gullá dákkár áššiid birra.
— Mii diehtit dat dáhpáhuvvá, lea stuora servodat mii ii dieđe dáid áššiid birra. Ii leat dávjá dákkár dáhpáhusat gevvet, dat gevvet muhtumin, muhto dat lea maid beare dávjá. Ii ge dáhpáhuva miehtá, muhto dat ii galggašii oba ge dáhpáhuvvat, lohká Ellinor Marita Jåma.
Loga maid: – Lávejin ballat okto vánddardit
Suohkana ovddasvástádus
NBR jođiheaddji lohká ahte movt sii sáhttet veahkehit dákkár áššiiguin lea fuomášuhttit, ja hupmat daid áššiid birra.
Son lohká ahte lea suohkana ovddasvástádus čorget dili. Son jáhkká dát dilli lea boađus dološ gáttuin ja umáhttuvuođas.
— Lea suohkana ovddasvástádus juohkit dieđuid álbmogii, ja hábmet buori servodaga. Ovdamearkka dihte ferte skuvllain oahpahit nuorat buolvvaide boazodoalu birra. Jus suohkan dárbbaša movt ge veahki dán áššis, sáhttet váldit minguin oktavuođa, ja mii sáhttit neavvut sin, lohka Jåma.
Boazodoalu árgabeaivi
Mannan čavčča almmuhuvvui vuosttaš oassi dutkanprošeavttas boazodoalu árgabeaivvi birra.
Dat čájehii ahte olu boazosápmelaččat vásihit cielaheami ja maid áitagiid go leat boazodoallit.
Dutkamis bođii ovdán ahte 68 proseantta boazodolliin leat ieža, dahje bearaš lea, vásihan cielaheami go gullet boazodollui. 47 proseantta lea vásihan áitagiid, bilidemiid dahje veahkaválddálašvuođa olggobeale olbmuin.
84 proseantta lohket ahte mediaid čállosat boazodoalu birra leat dagahan sidjiide dahje bearrašii váttisvuođaid dahje unohisvuođa.
Dutkit hirpmahuvve
Dutkama prošeaktajođiheaddji Snefrid Møllersen lohká dát ášši lea duođalaš, go cielaheami vuođđu lea juoga masa olmmoš ii sáhte maide, namalassi etnisitehta.
Psykologaspesialista ja dutki čilge jus dákkár dilli bistá guhkit áiggi, sáhttá váikkuhit sihke psykalaš ja fysalaš dearvvašvuhtii.
— Ii leat eahpádus ge, go gávdnojit lágat givssideami vuostá, ahte lea duođalaš ášši. Dan maid dát boazodoalli vásiha sáhttá dagahit ahte sus lea losit dilli, ja dat šaddá vel vearrát go lea áidna boazodoalli sullos. Olbmo psykalaš dearvvašvuohta sáhttá hedjonit, muhto maiddái fysalaš, go vásiha streassa. Lea duohta dearvvašvuođa riska, mii ii galggašii dáhpáhuvvat, muhto goit ge dahká dan, lohká Møllersen.
Dutkamis eai lean vuordán nu alla loguid cielaheami, ja dutkit njuolgut hirpmástuvve.
— Lea ahkit gullat dákkár vásáhusaid birra. Mun guhte in gula boazodollui, vásihan ahte lea hirpmástuhtti go olmmoš galgá cielahuvvot iežas čearddalaš duogáža dihte, go dat lea juoga masa ii veaje maide.
