Ná lohke Lujávrri sápmelaččat Sámi álbmotbeaivvi birra. Guovvamánu 6. beaivvi miehtá Sámi leat iešguđet ge ávvudoalut, lágideamit, suohtastallamat álbmotbeaivvi oktavuođas. Nu maiddái Guoládatnjárggas, gos ásset birrasii 1600 sápmelačča, leat leamašan doalut.
Birrasii logi buolašgráda lea olgun. Kvártta guoktenuppelogis giliolbmot, skuvlamánát, ámmátskuvlaoahppit, vuorraset olbmot, suohkana bargit, guossit ja journalisttat dievihit Sámi kulturguovddáža šilljui Lujávrris. – Tirrv, lohká okta. – Tirrv-tirrv, vástida nubbi. Gielddasámegiela sátni «Tirrv» mearkkaša «bures».
Olbmuin vuhtto buorre mokta. Buorástahttet nubbi nuppi, addet ava nubbi nubbái, sávvet lihku ávvubeaivvi oktavuođas. Soapmásis leat gávttit badjelis, dahje eará biktasat, mearkkat mat čájehit gullevašvuođa sámiide.
Ii soaittáhagas olmmoš levge
Murmánskka regiovnna ja riikka leavggat leat jo libardeame. Muhto sámeleavga ii vuos. – Min sámiid gaskkas leat olu čeahpes olbmot. Juohke jagi mii čuovvut maid leat bargan olbmot. Danin bovdet deike sámi leavgga levgemii Anna Sapelnikova, gii lea iežas barggus fievrrida sámegiela ja oahpaha duoji mánáide, lohkaba virggálaš dilálašvuođa láidesteaddjit Antonina Antonova ja Aleksandr Kobelev.
Nubbi lohká sámegillii, nubbi fas ruoššagillii.
Diplomaid juohkin
Murmánskka guovlu Duma dahje parlameantta áirasat Aleksandr Shestak ja Ludmila Vedishjeva leaba juohkán diplomaid muhtun sámi servodaga ovddasteddjiide geat regionála parlameantta mielas leat bargan earenoamáš buori barggu.
Daid Lujávrri sámiid gaskkas leat Domna Khomjuk, Roza Rakhmanina, Aleksandr Kobelev, Valentina Kirillova, Viktorija Kobeleva ja Anna Sapelmikova.
– Giitu go atnibehtet árvvus mu doaimmaid, čállá Domna Khomjuk gova vuolde man lea almmuhan sosiála mediain.
«Sámegiela seailluheami ja kultuvrra ovdáneapmi Guoládaga sámiide» ledje muhtun sánit diplomas maid lea ožžon Domna Khomjuk.
Beassážiid diibmá oaččui Domna Khomjuk maiddái Áillohačča bálkkašumi Guovdageainnus.
(Ášši joatká govvagalleriija vuolábealde)
– Dat lea min beaivi!
Ná lohke muhtun sámit geaiguin Ávvira luođujournalista humadii maŋŋá levgendilálašvuođa.
Sámi álbmotbeaivi lea dábálaš bargobeaivi ja danin oallugat manne fas skuvlii dahje bargui. Muhto ledje ge dat geaiguin lei dili veahá humadit.
– Dieđus dat lea dehálaš beaivi. Dat lea dakkár beaivi go mun čevllohalan dainna go lean sápmelaš. Dat lea min beaivi, dadjá Jakov Jushkov.
– Mun álggán dan beaivvi dainna go sávan lihku eamidii ja mánáide. Dan beaivvi lea dehálaš gávtti maiddái nahkehit. Lea ge buorre mokta, lohká fas Jevgenij Jushkov.
– Sámi álbmotbeaivvi, mu mielas, aŋkke dáppe Ruošša bealde, lea áidna beaivi jagis go allahearrát muitet min, dadjet čáppa sániid, čalmmustahttet muhtumiid, hupmet min sámi árvvuid birra. Muhto mun in hálit ahte dat galget midjiide čáppa sániid dadjat, lohpidit maid nu, baicce berreše birra jagi systemáhtalaččat bargat sámeservodaga dárbbuid váste. Ii ge dušše oktii jagis čáppa mojiiguin geiget diplomaid, lohká Valentina Sovkina, ja joatká:
– Muhto oainnán ahte sámi servodaga siskkobealde dát beaivi lea jo sajáiduvvan, olbmot čiŋadit dan beaivvi, háliidit leahkit dan beaivvi ovttas. Sámi olbmot atnet dan beaivvi iežaset ávvubeaivvin, dan gal mearkkašan mun, loahpaha iežas jurdaga Valentina Sovkina.
Badjel 150 lágideami
Murmánskka guovllu stáhta álgoálbmotguovddáža dieđuid mielde Sámi álbmotbeaivvi ávvudeami oktavuođas miehtá vahku Guoládatnjárggas lágiduvvojit badjel 150 lágideami nu go čájáhusat, seminárat, skuvladáhpáhusat, duodjebájit, girjjealmmuheamit ja nu ain.
