-Almmuhus-
-Almmuhus-
OĐĐASAT– Dát lea jallodat ja heaggaváralaš

– Dát lea jallodat ja heaggaváralaš

-

-

Nu lohká leansmánne Klemet Klemetsen Facebook-čállosiid birra gos gánddat rábmojit man jođánit nagodit vuodjit Guovdageainnus Mázii.

Moadde beaivvi áigi ihte Facebookii čállosat gos gánddat rábmojit man jođánit nagodit vuodjit Guovdageainnus Mázii. Čállosat leat priváhtasiiddus, maid Ávvir lea beassan oaidnit.

«– Vudjen 18-19 minuvttas oktii» ja diekkár sullasaččaid dat čálašit ieža. Muhtimat čuoččuhit vuodján maiddái vel oanehat áiggis, nu go 13 ja 16 minuvttas.

 

Guovdageainnus Mázii lea 61 kilomehtera, jus de vuodjá dien gaskka 18 minuvttas, de dat mearkkaša ahte gaskamearálaš leaktu biillas lea 203 kilomehtera diimmus. Dat lea oalle leaktu go jurddaša ahte muhtin sajiin dáidá bággu ložžet leavttu, ja eará gaskkaid ges de vuodjit vel garraseappot.

Muhtimat oidnojit čállán ahte leat rehkenastán dan rájes go 50-sona Guovdageainnu gilis nohká, dassái go jovdet Máze šalddi rádjái, diet gaska lea birrasii 56 kilomehtera.

Jus dan gaskka lea vuodján 18 minuvttas, de dat mearkkaša ahte gaskamearálaš leaktu lea leamaš 187 kilomehtera diimmus.

 

– Jallodat!

Ávvir riŋgesta Guovdageainnu leansmánnái Klemet Klemetsenii. Son ii loga gullan ge diekkár vuodjimiid ja čállosiid birra.

– Diet orru eahpejierpmálaš doaibma. Jallodat, lohká leansmánni.

– Olles ášši orru jallodat, diet lea heaggaváralaš, ii dušše alcces, muhto earáide geat maid leat johtimin geaidnoráigge, ja de vel čálašit dan birra sosiála mediain, lohká leansmánni ja vuhtto hirpmahuvvan.

 

Son ii loga goassege gullan ahte dien gaskka vudjet nie garrasit.

– Muhto dat lea geaidnopolitiijaid bargu dárkkistit leavttu, lohká Guovdageainnu leansmánni Klemet Klemetsen.

 


HIRPMAHUVVAN: Guovdageainnu leansmánne Klemet Klemetsen lohká leat jallodahkan vuodjit nie jođánit.
Vuorkágovva: Nils Johan Vars

 

– Rámpostallat nubbi nubbái

Ávvir ii leat fáhten ságaide su guhte álggahii dán ságastallama iežas Facebook-siiddus, muhto okta dain geat leat čálašan siiddus, searvá muitalit veahá.

Ávvir jearrá lea go dát dakkár eahpeformála gilvu gánddaid gaskkas.

– In mun gal dieđe nu gilvvu gal. Lea máŋga jagi áigi go mun vudjen alla leavttuin dien gaskka. Diet lea dušše diekkár ahte olbmát rámpostit nubbi nubbái, lohká almmái gean doalahat anonyman.

 

Jierbman

Son muitala iežas vuodján dien gaskka birrasii 20 minuvttas, dat mearkkaša ahte sus lea gaskamearálaš leaktu leamaš 170 kilomehtera diimmus.

Ieš árvvoštallá alddis leamaš 150 km/d gaskamearálaš leaktun. Jus nu lea leamaš, de lea ádjánan badjelaš 22 minuvtta dien gaskka vuodjit.

 

– Dat lea oalle leaktu?

– Na lea, lea dieđusge, lohká almmái ja boagusta veaháš, ovdal go šaddá duođaleabbon:

– Ii olmmoš jurddaš nu vuđolaččat go lea nuorra ja jalla. Dál in vuoje eisege nie garrasit šat. Dál lean rávásnuvvan ja jurddašalan makkár váikkuhusat sáhttet leat, lohká son.

 

Vaikke almmái ii loga dien leat gilvun iežaset gaskkas, de sin čállosat leat dakkárat maid dálá nuorat sáhttet atnit ovdagovvan.

– Jua, nu dat šaddá dieđusge, ja dat ii leat nu buorre gal. Dat sáhttá váralažžan šaddat, sáhttet jámas vuodjit iežaset, lohká almmái guhte gal ii loga iežas šat leavttuin stoahkat.

-Almmuhus-