-Almmuhus-
OĐĐASAT– Dát lea hui ahkit

– Dát lea hui ahkit

-

-

Ártni geasseorohagas, Romssa fylkkas, vásihit vuot orohatolbmot ahte sin vuojahangárddi leat soames billistan. Maŋemus jagiid leat čuohpadan gárddi ja áiddi, ja luoitán ealu olggos, ja dán giđa leat ges mohtorsaháin billistan ja sahen gaskat áidestoalppuid.

Ártni orohaga boazoeaiggát Inger Marie Gaup Eira muitala dat lea njuolga saboteren sin boazodoallodoibmii, go váikkuhus lea ahte sii eai beasa čuvvot iežaset plánaid nu movt ledje jurddašan.
– Mis lea siskkildas plána leamaš guottehit gárddi siste moadde jagi, iskan dihte movt váikkuha nu movt goaskin. Gárddi billisteapmi bisseha visot daid plánaid.

 

Okta olmmoš áitán
Diibmá leige soames čuohpadan sin gárddi ja luoitán ealu olggos, mii dagahii ahte eai beassan guottehit gárddi siste. Dan maŋŋel ledje ođastan gárddi, ja dál lea dat maid billistuvvon.
– Mii várohit ovtta olbmo leahkit bahádahkkin dás, go son mannan čavčča bođii ja logai boazovázziide ahte jus gárdi ii sirdojuvvo, de ii leat dat šat badjin go ollejit fas giđđat, muitala Gaup Eira.

 

Muđui buorre doarjja
Eira Gaup muitala olbmot ja verddet Ártnis lávejit nu vuordit go sii bohtet ealuin giđđat, ja lea muđui  hui buorre doarjja boazodollui.
– Lea hui ahkit go okta olmmoš galgá nie billistit ja báikki olbmot atnet dan maid hui unohassan.

 

Buktá balu
Danne sáddejedjege vuorjašumi dieđáhusa Fylkkamánnii čakčat, ja Eira Gaup mieđiha ahte lea veaháš ballu go billisteapmi orru vearrábun ja vearrábun šaddame jagis jahkái.
– Olmmoš dieđusge jurddaša mii lea boahtte mii sáhttá geavvat, ja viidu go nu ahte olbmuid nala dagaha bahá.

 

Dál áigot váidit
Eira Gaup lea ieš dál Guovdageainnus ja áigu váidit ášši politiijaide.
– Mii eat šaddan diibmá váidit politiijaide go juo eallu lei luiton luovos, ja guđiimet plánaid gárddi siste guottehit. Dál leat min siida johtime eatge leat vel ollen geasseorohahkii ja guottetbáikái. Dál gal áigut váidit ášši, ja bijan vel fárrui vuorjašumi dieđáhusa, lohká son.

 

-Almmuhus-