-Almmuhus-
-Almmuhus-
OĐĐASAT– Dát lea badjelgeahččanvuohta

– Dát lea badjelgeahččanvuohta

-

-

45 oahppi geat odne čađahit sámegielaeksámen Guovdageainnus ja Kárášjogas, vásihedje ahte eksámen maŋŋonii Oahppodirektoráhta teknihkalaš sivaid geažil.

Guovdageainnu nuoraidskuvlla ohppiin leat odne sámegieleksámenat, sihke vuosttašgiellan ja nubbingiellan. Eksámenbihtá vižžet oahppit ieža muhtin neahttabáikkis, muhto sii geat galge váldit eksámena sámegielas vuosttašgiellan, eai gávdnan eksámenbihtá neahttasajis.

– Nubbingiella eksámenbihtá gal gávdnui, muhto ii vuosttašgiela bihtá. Dat dagahii diehttelasat ahte oahppit vuorjašuvvo, dárragohte ja dat ii gálgga dáhpáhuvvat ná duođalaš beaivvi go eksámenbeaivvi, dadjá nuoraidskuvlla rektor Ellen J. Sara Eira.

 

Šattai eará ládje čoavdit

Eira muitala skuvlla bealis šaddan riŋgedit miehtá gullan dihte mo galget čoavdit dili.

– Loahpas šadden ieš mannat eará neahttasadjái gosa rektorat besset ja gávdnat dan, ja kopieregoahtit ohppiide, dát ádjánii diehttelasat iežas áiggi ja eksámen maŋŋonii 40 minuhtain. Dát lea áibbas dohkketmeahttun, iige sámegielas oro árvu go ii gávdno dat eksámenbihtá ge doppe gos galgá, dadjá eddon rektor.

Guovdageainnus váikkuhii dát 30 oahppái.

 

– Badjelgeahččanvuohta

Rektor muitala Kárášjoga vuođđoskuvlla maid váldán singuin oktavuođa go doppe galget leat vásihan dan seamma odne iđitdiimmuin. Sara muitala iežas váldán oktavuođa Oahppodirektoráhtain.

– Doppe dadje ahte sii han leat sádden midjiide eksámenbihtá báberhámis, ahte dan gal galggaimet de ipmirdit. Muhto ii dat leat midjiide boahtán, eai ge lohkan Kárášjogas ge ožžon dakkára, lohká Eira ja joatká:

– Dát lea badjelgeahččanvuohta, iige galgga dáhpáhuvvat. Doppe čilgejedje ahte dákkár sáhttá dáhpáhuvvat, muhto dasa in jáhke gal. Jus eará fágain dáhpáhuvašii dat seamma de livčče skuvllat miehtá huikimin ja gomihan Norgga.

 

Ovdal vásihan sullasaččaid

Kárášjoga vuođđoskuvlla rektor Arnulf Soleng duođašta iežaset bártidan seammaládje. Kárášjogas ledje ges 15 oahppi geat odne čađahit sámegiela vuosttašgiellan eksámena.

– Dahje eat dal leat mii bártidan, baicce Oahppodirektoráhtta bártidahttán min. Mii maŋŋoneimmet 45 minuhta dáinna, go šattaimet seamma ládje čoavdit go Guovdageainnus ge, čilge Soleng.

Maiddái son lea leamaš oktavuođas Oahppodirektoráhtain. Soleng lohká maid iežas ovdal vásihan sullasaš váttisvuođaid sámegielaeksámeniid oktavuođas.

– Dalle čájehuvvui ahte Oahppodirektoráhtta lei meaddán.

 

Ii Soleng ge oro nu duđavaš dáinna mii lea dáhpáhuvvan odne:

– Šattaimet mánáid vuorddihit, ja sii ledje ráhkkanan elektrovnnalaččat čađahit eksámena, dál šadde báhpirii čállit. Nu maiddái šaddat mii sáddet eksámenvástádusaid poastta mielde, ja de maŋŋonit maiddái sensorat, čilge son.

 

Oahppodirektoráhta šálloša

Finnmárkku Fylkkamánni Bajásšaddan ja oahpahusossodagas, mii gullá Oahppodirektoráhtii, muitalit leamaš muhtin lágan teknihkalaš sivva neahttasiiddus gos eksámenbihtát galget gávdnot.

– Eat dieđe juste gokko sivva lea, muhto Oahppodirektoráhtas leat bargamin áššiin, dadjá Bajásšaddan ja oahpahusossodaga ráđđeaddi Laila Strandbakken Smuk.

Smuk lohká iežas bures áddet go rektorat lohket dán leat dohkketmeahttumin.

 – Dan gal ádden bures, lean ieš háleštan Eirain, ja lea hui šállošahtti go ná geavvá, erenoamážit sámegielain mii jo lea hearkkes dilis, lohká Smuk.

 

Smuk dattege ii leat ovttaoaivilis dasa ahte dákkár dáhpáhusat orro dávjjit dáhpáhuvvamin sámegielaeksámeniid oktavuođas.

– Dát lea dáhpáhuvvan ovdal maiddái eará fágain, nu in hálit gal dadjat ahte dát dáhpáhuvvá dávjjit muhtin fágaid eksámeniid oktavuođas, čilge son.

 

 

-Almmuhus-