-Almmuhus-
ÁVVIR CUP 2019 Dát joavkkut deaivvadit Ávvir Cupas

Dát joavkkut deaivvadit Ávvir Cupas

-

-

Guovdageinnu valáštallansearvi lea vuorbádan makkár joavkkut deaivvadit go historjjá vuosttaš Ávvir Cup čievččastuvvo johtui boahtte vahkkoloahpa. 

Njuolggosáddagis Facebookas vuorbádeigga Guovdageainnu valáštallansearvvi  Svein Ole Sandvik ja Janne Eileen Mienna Guttorm  joavkkuid mat galget deaivvadit Ávvir Cupa álgočiekčamis. Guhtta nissonjoavkku ja 14 dievdojoavkku leat juhkkojuvvon guovtti ja golmma puljii. 

Nissonjoavkkut

Nissonjoavkkut leat juhkkojuvvon guovtti puljii ja buot joavkkut seamma puljjas deaivvadit guovtte geardde nu ahte buot joavkkut besset čiekčat unnimus njeallje čiekčama. 

Vuosttaš puljjas deaivvadit Buldoser, Spårtsklubben ja Thomassen´s Myggjenter.

Nuppi puljjas ges PSG, Seriøst Useriøs ja Nedrykk FK. 

Go geahččá joavkkuid mat leat searvan, de leat PSG ja Buldoser joavkkut mat čikče loahppačiekčamiid maŋemus Nilut cupas, mii lágiduvvui diibmá. PSG vuittii finála ja Buldoser fas vuittii bronsafinála. Dát guokte joavkku eai deaivvat ovdal go áramusat Ávvir Cupa semifinálas. 

Dievdojoavkkut

Dievdojoavkkut leat juhkkojuvvon golmma puljii. Pulja 1:s ja 2:s leat vihtta joavkku ja pulja 3:s ges leat njeallje. 

Vuosttaš puljjas deaivvadit Benchwarmers, Skánit, Láttošluohkká IL, Pandoras ja Samba.

Nuppi puljjas deaivvadit ges Kaffe & Sigg FC, Team Shalabajs, Wunderbaums, Nedrykk FK ja Lubben Ballklubb.

Goalmmát puljjas, mas leat dušše njeallje joavkku, leat Storlule, Sambaklubben Smikkesmukk, Guovdageainnu Lunttat ja FC Roggi. 

– Dát pulja orru mu mielas šaddamen mearehis garas. Sambaklubben Smikkesmukk lea okta dain joavkkuin maid mun árvvoštalan ollet guhkás, ja sáhttet maid gitta finálii ollet, dadjá Ávvir Cupa turneringjođiheaddji Svein Ole Sandvik. 

Go geahččá dáid joavkkuid bohtosiid maŋemus Nilut Cupas, de oaidná ahte vuosttaš ja goalmmát puljjas leat joavkkut mat deaivvadedje bronsafinálas diimmá Nilut cupas, namalassii Sambaklubben Smikkesmukk ja Skánit. 

– Stuora oiddohat

Sandvik dadjá váttisin einnostit dievdduid čiekčamiid ja mii dáin lea oiddot, muhto nissoniid bealis son ii eahpit. 

– PSG lea stuora oiddot go geahččá ovddeš bohtosiid. Sii leat leamaš hirbmat buorit ja leat hárjánan futsal-čiekčamiidda. Dievdduid bealde gal lea váddásit. Skánit lea okta dain buoremus joavkkuin ja mun einnostan ahte sihke Skánit ja Sambaklubben Smikkesmukk dahket bures. Nu go namuhin, de lea dat goalmmát pulja mu mielas hui garas, doppe sáhttá vaikko mii dáhpáhuvvat, dadjá Sandvik vel loahpas. 

- Advertisement -
-Almmuhus-