-Almmuhus-
Beassážat 2022– Dát joavkkut dat loktejit miella­lági

– Dát joavkkut dat loktejit miella­lági

-

-

Kárášjoga festiválaid jođiheaddji Kenneth Eliassen lohká hirbmat duhtavažžan dán jagáš beassášprográmmain. Son lohká ovdal oaidnán guđet joavkkut dat geasuhit eanemusat konsertii.  

– Maŋŋel go máŋga jagi lean lágidan beassášfestivála Kárášjogas, lean oaidnán makkár musihkka ja geat leat eanemusat geasuhan gehččiid. Danne lean erenoamáš duhtavaš dán jagáš artisttaiguin ja joavkkuiguin. Sii leat álo buktán olbmuide buoremus dovddu konsearttain dáppe, dadjá Karasjok Festivaler jođiheaddji Kenneth Eliassen Ávvirii.

Eliassen lea 2015 rájes lágidan beassášdoaluid Kárášjogas. 

Valáštallanhállas konsearttat

Eliassen muitala ahte sii rahpet festivála gaskavahku konsearttain valáštallanhállas, mas vuos Mikkel Gaup oktan joavkkuinis Áidna ligge gehččiid, ovdal go Mari Boine doallá dievaslaš konseartta.

Skilleduorastaga lea ges álggos nuoraid- ja bearaškonsearta mas čuojahit Rolffa ja GM, Agnete joavkkuin ja Biti joavku. Eahketkonsearttas čuojaha ISÁK joavku, Agnete joavkkuin, Felgen Orkester ja Biti.  

BIVDÁN ČUOJAHIT JOAVKKUID MAT LOKTEJIT MIELLALÁGI LÁVDDIS: Karasjok Festivaler jođiheaddji Kenneth Eliassen lea duhtavaš dán jagáš beassášprográmmain.  Vuorkágovva: Anne Rasmus
BIVDÁN ČUOJAHIT JOAVKKUID MAT LOKTEJIT MIELLALÁGI LÁVDDIS: Karasjok Festivaler jođiheaddji Kenneth Eliassen lea duhtavaš dán jagáš beassášprográmmain.  Vuorkágovva: Anne Rasmus

Čoaggán báikkálaš joavkkuid

Beassášlávvordaga lea valáštallanhállas fas eahketkonsearta, mas čuojahit Staysman, Intrigue, Rolffa ja Biti. 

– Mii leat maid geahččalan oažžut nu olu báikkálaš dahje dán guovllu artisttaid go sáhtiimet. Maŋŋel guokte pandemiijajagi leat sis leamaš unnán čuojahanbarggut, ja dán jagi háliideimmet sin maiddái doarjut. Beassášlávvordaga leat ožžon Staysman deike, gii lea šaddan measta bealle finnmárkulažžan. Son lea bargan NRK Sámis ja nu ožžon lagas gullevašvuođa dán guvlui. Son liiko leat dáppe ja čuojahit dáppe. Lei maid hui vuogas oažžut earáid go dušše báikkálaš musihkkáriid fárrui, dadjá Eliassen. 

Oanehis áiggis plánen

Eliassen lohká guhká leamaš eahpečielggasin šaddet go beassášdoalut dán jagi, ja easkka ođđajagis oidne movt šaddá. Vehá oanehis áigi lei dál plánet visot, muhto dan ii loga čuohcan prográmmii. 

-Almmuhus-