Álggos leat golbma gažaldaga, jus daid máhtát, de manat viidáseappot gilvvus.
Namma: Lasse Wigelius
Ahki: 36
Guovlu: Guovdageainnus orru, deatnulaš
Bargu: ovttas.no WEB doaimmaheaddji
1. Movt lea loahppa dán sátnevádjasis: «Gáttis gal leat viisát go….»?
– fávllis manná funet, vástida Wigelius. RIEKTA!
2. Gii lea Deanu gieldda sátnejođiheaddji dál?
– Dat lea Frank Ingilæ. RIEKTA!
3. Mii lea Norgga ruvdnaprinsa Haakon Magnusa boarráseamos máná namma?
– Amma hal dat lea Maud Angelica.. Ii, Sverre Magnus. BOASTUT!
Rievttes vástádus: Ingrid Alexandra
Go Wigelius ii vástidan riekta buot golbma vuosttaš gažaldaga, de son ii mannan viidáset gilvvus. Son dattetge beassá geahččalit vástidit árvalusa mainna sáhttá fasket 5, 10 dahje 15 čuoggá. Dát lea dan duohken guđe ivnni vállje. Rukses árvalus lea váddáseamos, ja jus dan vástida riekta de oažžu 15 čuoggá, alit árvalusas faske 10 čuoggá ja ruonás ges 5 čuoggá.
Wigelius vállje rukses ivnni ja mii jearrat sus dán árvalusa:
Mii lea dat: Boradettiin orru jávohaga, muhto go baikigoahtá, de bárggáda?
– Ii dien gal dieđe, pass.
Rievttes vástádus: Bissu
– Eai lean nu váttis gažaldagat, muhto šattai nu preassa go lei gilvu, dadjá Wigelius gilvvu birra.
Galle čuoggá oktiibuot: 2 čuoggá
Juohke gilvaleaddji beassá hástalit ođđa gilvaleaddji Ávvira geassegilvui, ja Wigelius háliida hástalit Nils Runar Hætta searvat Ávvira geassegilvui.
Njunnošis Ávvira geassegilvvus dál: Lemet Ánde Stueng 16 čuoggáin.
