– Dát ii leat heivvolaš iige dohkálaš

Suomabeale Sámediggepresideanta Tiina Sanila-Aikio muitala sámedikki leamaš oktavuođas sihke Finnartist Oy:n ja Suoma ovttaveardásašvuođaáittardeddjiin, Carola Miller geažil, guhte galgá Miss World -gilvvuin ovddastit Suoma.

– Leat bivdán Finnartist oy:s, ahte Carola Miller ii geavahivčče gilvvuin gáktelágan biktasa, go dat ii leat heivvolaš iige dohkálaš. Dat maiddai muitala, makkár Suomas sápmelaččat dán áigge ellet: Suomas gos sámiid eai gudnejahtte ja sápmelaččaid kultuvra lea dušše ávkkástallan- ja suohtastallanášši.

Lágideaddjit eai leat vástidan

Miss World -gilvvut lágiduvvojit Kiinnás juovlamánu 12. beaivvi. Suoma nieida lea ieš válljen geavahit gáktelágan biktasa go buot gilvvu oassálastit galget čájehit álbmotbiktasiid, čállá Yle Sápmi.

Sámediggi ii leat vuos ožžon vástádusa Finnartist fitnodagas, mas lea ovddasvástádus Miss World -gilvvuin Suomas.

Sanila Aikio muitala Ovttaveardásašvuođaáittardeaddji leamaš oktavuođas sihke Sámedikkiin ja Finnartist oy:in, dan birra lea maiddái Yle Sápmi čállán.

Diehtojuohkinguovddáš áigeguovdilis jurdda

Ikte čálii Ávvir dan birra mo suomabeale sápmelaččat reagerejedje áššái. Outi Länsman, guhte lea nammaduvvon dán jagáš sápmelažžan, namuhii earret eará ahte dáidá leat dárbu ásahit sierra diehtojuohkinguovddáža Supmii.

Guovddáš galggašii rávvet buohkaid geat áiggoše geavahit sámekultuvrra.

– Áinnas lea áigeguovdil jurdda ásahit diehtojuohkinguovddáža. Nuppe dáfus albma ja rivttes diehtu gal gávdno, jus háliida veahášge ohcat. Ferte namuhit, ahte Sámediggi lea ráhkadan earret eará evttohusaid ja cealkámušaid, mo suopmelaččaide, erenomážit skuvllalaččaide, sáhtašii juohkit dieđuid sámiid birra. Sámedikkis lea leamaš maiddai Ofelaš-doaibma, lohká Sanila-Aikio dása.

Ieš Carola Miller lea átnun ándagassii, muhto ii leat vuos vástidan áigu go liikká geavahit gáktelágan biktasa gilvvuin.