Namma: Maren Benedicte Nystad Storslett
Ahki: 23
Guovlu: Guovdageaidnu
1. Gii vuittii dán jagáš juoiganoasi Sámi Grand Prixas?
– Dat gal lei Hálgon, Kim Hallgeir Berg. Riekta!
2. Jus skire hukse beasistis vulos, maid lávejit dálkeeinnosteaddjit de oaivvildit?
– Dat šaddá báhkka geassi. A-a, vuorddes. Hás de šaddá čoaska geassi. Juo, dan mun dajan. Riekta!
3. Mat ivnnit leat golbma vuođđoivnnit?
– Hm … Dat leat alit, ja de lea ruoksat ja fiskat. Riekta!
Liigegažaldagat:
Máren Benedicte lea dat vuosttaš gii dán geasi lea nagodan vástidit riekta buot gažaldagaid.
Dat mearkaša ahte son oažžu vástidit liigegažaldagaid.
Nu guhká go vástida riekta, manna son viidáseappot.
Juohke rievttes vástádusas oažžu 1 čuoggá.
Makkár nieidanamma lei bivnnuheamos 2018:s?
– Mii son dat sáhttá leahkit? Ehm… meine go Norggas? Jus lea norggas de mun jáhkán dat lea Emma. Riekta!
Mii lea adveantta ivdni?
–Adveanta ivdni gal lea sáhppat! Riekta!
Gos gávdno suohtastallanpárka Tivoli?
–Tivoli lea Københámmanis. Riekta!
Lea go musihkkajoavku Deatnogátte Nuorat almmuhan skearru?
–Jua. Riekta!
Makkár mánus lea muhtin lotti namma?
–Ehm… njukčamánnu. Riekta!
Mo lávejit dadjat čuoikka vahkku ovdal mihcamáraid?
–Eh… in dieđe, lea go unnán čuoika de? Dahje ahte dat čuike de. Boastut!
Rievttes vástádus: Vaikke guovtte soabbái
Árvadus:
Maren Benedicte vállje rukses ivnni, ja oažžu dán árvádusa:
Mun lean juoga mii in leat mihkke, muhto liikká mus lea namma. Muhtumin lean oanehaš ja nuppes fas guhkki. Mun lean du guoras, ja go valáštalat, de lean maid mielde. Mii lean mun?
– Dát lea sihkkarit juoga mii lea hui logihkalaš. Muhto, mii dat sáhttá leat? Hehe, mun ferten dadjat ahte in dieđe dan. Boastut!
Rievttes vástádus: Suoivvanas
Galle čuoggá oktiibuot: 8
– Ha-ha, sáhtášii go dán váldit ođđasit? Dát gal lei veahá hearvái! reašká Nystad Storslett.
Maren Benedicte muitala ahte luomus dássážii son lea gorron, muhto áigu fitnat Oslos ja dieđusge festiválain.
Maren Benedicte hástala Elle Mari Dunfjell Oskala searvat Ávvira geassegilvui.
Njunnošis gilvvus: Elen Marianne Utsi, 15 čuoggáin.
