-Almmuhus-
Featured box1– Dat duolddai helget­láhkai rutnis

– Dat duolddai helget­láhkai rutnis

-

-

Per Edvard Johnsen muitala son šattai goit diibmobeali lodjudit badjel logi kilosaš dápmoha ovdal go sáhtii geassit dan bajás rutnis. 

Vuolit Molleža duottarstobu jođiheaddji Per Edvard Johnsen muitala ahte Iešjávrris sáhttá muhtomin goddit albma stuora dápmohiid. Moadde dákkára goddá son juohke jagi, ja ovdalaš juovllaid gottii son juo 9,2 kilosaš dápmoha. Muhto dán háve gal dettii dápmot badjel logi kilo.

Oaggume son lei go dat dohppii vuggii. Ii ge lean dušše oažžut dan bajás rutnis.  

– Diibmobeali mun gal bargen dainna, go manná vehá áigi ovdal lodjugoahtá. Ii dan ábut viggat ovttatmano gaikkihit, go dan ii oaččo bajás nie. Mun luiten ain, vai ii nu garrasit čavgga, ja de fas gessen ja ain luoitilin, čilge son Ávvirii.

Per Edvard lohká iežas diehtit gokko goddá stuora dápmohiid dan stuora Iešjávrris, ja son lea juo ráhkadan galjes rutni daid váste. 

– Dakko lea stuoradápmotjohtolat, ja dakko dat deivet stuorahat dohppet. Juo, ja mus dat gal lea das hui galjes rutni man láven duljiin vel gokčat vai ii jieŋo gitta. Láven sáittiin dearpat go ain baskugoahtá dat rudni, muitala son. 

Loga maid:
Gottii stuoraha Iešjávrris

–Turisttaide vásáhus

Sus deaivvai leat vel turistajoavku boahtán Álttás ja Viestterállasis fárus dán oaggunmátkkis, ja sidjiide šattai vel erenoamáš vásáhus dán beaivvi jávrre nalde. 

– Álggos dat gal navde mun dušše dájun, muhto sii han maid oidne ahte dat han gal duoldá helgetláhkái go lahkona rutni. Ii leat leaika go diekkár stuora guolli galgá bajás, muitala Per Edvard. 

Máinnastan ovdal

Ávvir ii leat ožžon ságaide ovttage dan joavkkus geat galget leamaš fárus, muhto dat guossit ledje Johnsena ságaid mielde hui duhtavaččat mátkkiin, ja šattai hui hearvái vel go sii ledje eahkeda ovdal gullan fearána sus juste logi kilosaš dápmoha birra. 

– Ledjen oktii goddán stuora guoli ja almmuhin dan sosiála mediain, muhto mun ledjen dalle ribahan lasihit moadde kilo dasa. NRK TV maid álggii jearahit leago duohta. Na juo, dat lea duohta, mun vástidin. Na sii áigo boahtit filbmet. Na juo, dat lei ortnegis, vástidin. Muhto šattai vehá bárti movt mun de galggan go dat guolli ii deaddán eambbo čieža kilo. Go NRK bođii, de leimme moai olbmáin hutkan buori plána. Leimme bátti čatnan dakkár hirbmat ruosta, dávgebismárrii, ja son de suoli gaikkui dan bátti go mun čuorvvun čieža, gávcci, ovcci, logi kilo. Ii ge dan fuomášan oktage dalle, ja muitalus sáddejuvvui TV:s maid, máinnasta son ieš. 

– Na, seammát dál lea maid dušše máinnas dus, lei han oalle lahka vel cuoŋománu 1.beaivvi?

– Ii leat dát gal dušše máinnas. Dát gal lea áibbas duohta muitalus. Mun lohpidan dan, boagusta Per Edvard. 

´

-Almmuhus-