Sállana stuorimus rockefestivála, Sørøyrocken lea dál almmuhan moadde artistta geat galget čuojahit boahtte jagi festiválas.
Sállana stuorimus rockefestivála, Sørøyrocken lea dál almmuhan moadde artistta geat galget čuojahit boahtte jagi festiválas.
Sørøyrocken mii lágiduvvo Márregobis Sállanis, lea dál almmuhan golbma artistta geat lávkejit goikeguollelovttalávdái (Tørrfiskloftet) suoidnemánus.
Sámi elektropop artista Ágy čuojaha. Su musihkka lea ođđamállet mas mihtilmas oasit leat eŋgelasgillii ja sámegillii, ja su musihkas leat vel árbevirolaš luohteoasážat, čállá Sørøyrocken preassadieđáhusas.
Cazadores, Romssa joavku, leat guktii ovdal čuojahan Sørøyrockenis, ja lágideaddjit leat fas bovden Cazadores boahtit guoimmuhit festiválas.
Goalmmát joavku man leat almmuhan vel, lea dovddus Norgga rockjoavku Skambankt.
Jakob Oftebro?
– Jakob Oftebro áigu boahtit Sállanii jus sus eai leat eará barggut juste dalle, muitala festiválahoavda Ken A. Brox gii dál lea bargoustit Oftebroain. Dan oktavuođas lea son govven iežas bargoustiba gii doallá báhpira mas čužžot artistanamat.
Muđuid muitala festiválahoavda Brox ahte sis lea juo measta dievvan prográmma, gávcci mánu ovdal go festivála álgá, ja juovlamánus fas almmuhit muhtin artisttanamaid geat čuojahit Sørøyrockenis boahtte geasi.
