-Almmuhus-
-Almmuhus-
OĐĐASAT Dát biila­vuoddjit suhttadit earáid eanemusat

Dát biila­vuoddjit suhttadit earáid eanemusat

-

-

«Sotnabeai-vuojašeaddji» dahje biilavuoddjit geat vudjet vuollel leahttoráji leat dat geat eanemusat suhttadit eará biilavuddjiid. 

61 proseantta biilavuddjiin leat vásihan várálaš dilálašvuođa johtolagas dan dihte go eará biilavuoddjit vudjet vuollel leahttoráji.

Gjensidige dáhkádusfitnodat čállá preassadieđáhusas ahte iskkadeamis, maid Ipsos lea sin ovddas čađahan, čájeha ahte 61 proseantta biilavuddjiin Finnmárkkus leat vásihan várálaš dilálašvuođaid johtolagas dan dihte go eará vuoddjit vudjet vuollel leahttoráji. Máŋggas leat vásihan vuodjit vuojána maŋábealde mii vuodjá ollu vuollel leahttoráji. Jus de bohtet olu vuojánat ovddal, ja jus leat mohkkás ja heajos luottat, de sáhttá leat váttis vuodjit meattá. 

Hárdašuvvet

Seammás dadjet 47 proseantta ahte sii hárdašuvvet dávjá dahje muhtomin dan dihte. Nuorat biilavuoddjit hárdašuvvet eanet go sii geat leat boarrásat. Dievddut vásihit eanet várálaš dilálašvuođaid ja hárdašuvvet eanet go nissonolbmot.

– Jus hárdašuvvá eanet ja eanet, de dađibahábut muhtumat ribahit suhtihit ja vudjet meattá, maiddái gaskkain gos ii leat doarvái várddus. Juohke jagi dagahit dákkár meaddelvuodjimat surgadis váikkuhusaid, dadjá Gjensidige gulahallanjođiheaddji Pål Rune Eklo.

Positiiva jurdagat

Dáhkádusfitnodagaid logut čájehit ahte vuosttaš guhtta mánu dán jagi ledje 12 500 stuorit ja unnit meaddelvuodjin- ja oktiibeaškkehanlihkohisvuođat. Lea čielggas ahte lea várálaš vuodjit badjelmeare leahtuin, muhto vuodjit njozet sáhttá maid mielddisbuktit várálaš dilálašvuođaid.

– Ferte vuhtiiváldit earáid johtolagas. Jus du maŋábeallái gártet ollu biillat, de lea buoremus luoitit biillaid meattá heivvolaš báikkis. Čuovo mielde speadjaliin ja johtolagas. Ale hárdašuva jus earát vudjet meattá, jurddaš positiivvalaččat, ávžžuha Eklo preassadieđáhusas.

- Advertisement -
-Almmuhus-