Dássážii lea gávcci olbmo heavvanan suoidnemánus. Oktiibuot leat dán jagi heavvanan 41 olbmo čájehit Redningsselskapet logut.
37 olbmo leat dán jagi heavvanan Norggas. Dasa lassin leat njeallje norgalačča heavvanan olgoriikkas. Seamma áiggi diibmá ledje 41 olbmo heavvanan Norggas oktiibuot.
– Geassemánu buorre vuolgga, mas ledje uhcit lihkohisvuođat go ovddit jagiid, ii čuvvon dađi bahábut suoidnemánnu. Redningsselskapet, dahje gadjunfitnodat, ávžžuha buohkaid jurddašit sihkkarvuođa ja áimmahuššat nubbi nuppi, lohká Redningsselskapet heavvananeastadeaddji fágahoavda Tanja Krangnes.
Lustafatnasis heavvanan
Bealli dain heavvananlihkohisvuođain suoidnemánus leat dáhpáhuvvan astoáiggefatnasiin. Muhtin boarrásat tuiskalaš heavvanii go su fanas gopmánii Smøla gielddas, Møre ja Romsdal fylkkas. Buokčit gávdne muhtin norgalaš albmá 70 jagiin heavvanan Ruoŧas. Hvaler bokte heavvanii norgalaš almmái ja ruoŧa nisu go sudno fanas vujii coahkásii. Guokte olbmo heavvanedje suoidnemánus go leigga gálašeamen. Guokte albmá heavvaneaigga jávrris mátta Norggas. Muhtin almmái 60 jagiin heavvanii ges go lei buokčamin Anda gielddas Nordlánddas. Svinesund šaldi bokte gávdnui almmái heavvanan. Ledje 35 almmáiolbmo ja guhtta nissonolbmo ja dain 41 olbmo searvvis ledje golbma máná.
Heavvanan statistihka ođđajagemánus suoidnemánu 16. beaivái
Sivva (lihkohisvuođa logut olgoriikkas ruođuid siste)
Astoáiggefanas: 17 (1)
Gahččan gáttis: 13 (1)
Gálašeapmi: 5 (2)
Fidnufanas: 4
Buokčan: 2
36 almmáiolbmo (85 %)
6 nissonolbmo (15 %)
