-Almmuhus-
OĐĐASAT– Dasa čáhká fiinna, stuora govva

– Dasa čáhká fiinna, stuora govva

-

-

Ná veahá skealmmat govvida Ande Somby iežas ođđa LP-skearru «Juoiddá Joavdan» man almmuhii Londonis, Englánddas.

Ande Somby, gean dovdet olusat sápmelažžan, sirbmálažžan, romsalažžan, unna sápmelažžan, láhkačeahppin, servodatberošteaddjin, juoigin, buvttadeaddjin, konferánssaid láidesteaddjin ja veahá duojárin, lea gieskat almmuhan iežas ođđa LP-skearru man namma lea «Juoiddá Joavdan». «Juoiddá Joavddan» lea artistta vuosttaš LP-skearru man son lea almmuhan. Vuosttamužžan LP-skearru birra Ande muitalii iežas 4 968 Facebook-ustibii golggotmánu 23 beaivvi.

 

Mii lea «Juoiddá Joavdan»?

FÁKTADIEĐUT. Dáiddalaš eallin

Ánde Somby lea riegádan 1958:s Sirpmás, Norggabeale Sámis

Juoigagođii 1974 rájes almmolaččat.

Lei mielde buvttadeamis čuovvovaš CD-skearruid:

– Ean Máššan. Aslak A. Somby ja Karen K. Somby, DATLP 1 / DATMC 1 1985

– Ravddas Ravdiiŋ. Máhtte Iŋgá – Inga Juuso, DATCD-9 / DATMC-9 1991

– Deh. Ivvár Niillas – Nils Porsanger, AmmaCD-01 1998

– Deh2. Ivvár Niillas – Nils Porsanger, AmmaCD-02 1998

 

2003-2007 áigodagas Vajas joavkku juoigi ja lávlu.

Joavku almmuhii 2006:ss «Sacred stone» CD-skearru.

2009 rájes Sombán joavku doaimmas.

 

Gáldu: http://somban.com

LP-skearrus, man namma lea «Juoiddá Joavdan» leat njeallje luođi. Okta dain lea «Gumpeluohti» mii bistá 18 minuhta ja lea mii váldá olles saji duogbealde LP-skearru.

– Dat lea hui earenoamáš juoigan, doppe lea maid 18 minuhtasaš gumpeluohti. Lean maid juoigan eatnanvuložiid. Dološ sámi jurddašanvuogi mielde sii geat leat nuppe bealde. Diet leat diekkár bealit maiguin mii sápmelaččat lávet veahá heahpanaddat, ja daid lean dál váldán albmosii, muitala artista Ávvirii.

Juoigan, Ande Somby mielas, lea dat vuohki mii veahkeha oažžut oidnosii dan mii ovdal lei heahpat, albmosii. Danin son juoiggai dáid luđiid.

 

Ollu váimmu

Somby mielas ii sáhte válljet duon dahje dán luođi ja navdet dan: «dát dat lea buoremus».

– Mun lean sihke olbmuiguin váimmolaš olmmoš ja seamma ge luđiiguin. Ollu váimmu attán buot daidda luđiide, danin in sáhte dadjat dát lea dat buoremus, muitala Somby.

 

Ii leat seamma

Maŋŋá go «Vajas» joavku heaittihuvvui 2007:s, de Ande Somby álggahii «Sombán» joavkku 2009:s. Joavku čuojahii earret eará Márkomeanus. Son dattetge lohká iežas dát ii dat leat seamma maid artista almmuhii gieskat Londonis.

– Dán LP-skearrus leat eará musihkkárat, dás gullojit lottit, gufihttarat, eará musihkka maid. «Sombán» lea fas eará. Doppe mus leat fárus eará musihkkárat. Sáhttá dadjat ahte juste dál leat mus guokte sierralágan musihkkajoavkku seamma áiggi, čilge Somby.

 

 

– LP sáhttá doallat gieđas

Musihkkára oainnus lea musihka ollu buoret almmuhit LP-skearru hámis iige almmuhit dan musihka beare internehttii.

– Dá lea dakkár dološmállet vinylaskearru. Smiehtadin maid galggan ráhkadit ja de mearridin mun almmuhan LP-skearru. Lea somát guldalit LP-skearru go ođđaáigásaš skearruid. ja ollu somát go interneahta bokte guldalit musihka. Dát lea dakkár man sáhttá gieđas doalat, geahččat govaid, bláđestit gihppaga jus dat lea, čilge Somby manne lea válljen LP-skearru hámis almmuhit luđiid.

Son vel lasiha ná:

– LP lea maid stuorát ja dasa čáhká fiinna, stuora govva. Mii sápmelaččat han leat čigŋás olbmot, dadjá Ánde skealmmat.

 

Eai máhte dáppe

«Juoiddá Joavdan» lea báddejuvvon Lofuohta guovllus Norgga bealde, muhto loahppabarggut leat dahkkon Londonis, Englánddas.

– Dáppe Norggas eai máhte šat LP-skearruiguin bargat. Unnu sakka gealbu juste LP-skearruid ektui. Danin lean válljen válbmet barggu Londonis.

LP-skearru lea válbmen Chris Watson, guhte lea dat olmmoš máilmmis gii váldá luonddu jienaid buoremusat.

 

Soaitit Romssas

Dál vuos Somby musihkka lea oastin ládje Londonis, Englánddas, muhto artisttas leat ge plánat.

– In leat jurddašan stuorrát, muhto soaittán skápma mielde doallat juogalágan almmuhandilálašvuođa Romssas ge. Galgá oaidnit mo vuostái váldet, lohká Somby.

 

 

 

 

 

 

 

 

 

-Almmuhus-