Biebmobearráigeahčču lea vuosttaš geardde dárkkistan olgobeatnagiid čálggu.
Biebmobearráigeahčču čállá preassadieđáhusas ahte vuodjinbeatnagat ja eará beatnagat mat orrot olgun ledje sin ulbmiljoavkun go dárkkistedje beatnagiid čálggu. Dat lei riikkaviidosaš gozihandoaibma maid čađahedje 2018:s ja cuoŋománu álggus diibmá.
Oassin prošeavttas lei bagadallat beanaeaiggádiid maid beana dárbbaša vuoi lea buorre dilli go orru olgun.
Viidáseappot čállá Biebmobearráigeahčču ahte jus beana galgá orrut olgun, ferte das leat vuogas ja oadjebas beanavisti gos ii galbmo ja gos beassá goarjadit vuohkkasit.
– Das ferte maid buorre bearráigeahčču ja dikšu, buorre biras ja doarvái lihkadeapmi ja aktiviseren, muitala šibitdoavttir Torunn Knævelsrud, gii lea jođiheaddjin Biebmobearráigeahču elliidčálggu ossodagas.
Doahttalit lága
Bearráigeahččit eai gávdnan rihkkumiid 75% dáluin maid dárkkistedje gos vuodjinbeatnagiid dollet. Dáluin gos eará mállet beatnagat mat orro olgun ledje, ledje eanet go bealli geat rihkkot lága. Dain dáluin ledje maid dávjá eanet rihkkumat.
– Beatnagat mat orrot olgun gáibidit ollu, ja eaiggádin ferte leat máhttu, návccat ja áigumuš láhčit beatnagiidda buori eallima, dadjá Knævelsrud preassadieđáhusas.
Eanas rihkkumat guske heivehuvvon beanavisttiide ja goarjadansadjái. Biebmobearráigeahčču maid gávnnai beatnagiid main lei beare unnán lihkadanvejolašvuohta, ja eai ožžon doarvái aktiviserema ja lihkadeami.
Sii dárkkistedje 453 dálu, ja 23 dain ledje nu roavva láhkarihkkumat ahte beanaeaiggádat gohčohalle ovttatmano divvut dili.
Preassadieđáhusas čállá Biebmobearráigeahčču ahte beatnagat ledje heajus divššu ja bearráigeahču ožžon. Golmma dálus válde beatnagiid gaskaboddosaš dikšui dahje heaittihedje doallamis beatnagiid.
