Vuosttaš muohta ii boađe čuorvvu. Jus vuoját biillain mas geassedeahkat de sáhttá biilla goahcangaska guhkut beliin ja politiija sáhttá du váidit.
Jus biillas ii leat doarvái buorre coakci, de sáhttá politiija váidit biilavuoddji.
– Mii dárkkistat man buorre coakci biiladeahkain lea, erenoamážit minsttarčikŋodaga. Ii leat gildojuvvon vuodjit geassedeahkaiguin dálvit, muhto jus lihkohisvuohta dáhpáhuvvá heajos coavcci dihtii, de váidojuvvo biilavuoddji, lohká Oslo Politiijaguovllu Johtolatjoavkku politiijabálvá Finn Erik Grønli.
Áigemearri molsut dálvedeahkaide lea skábmamánu vuosttaš beaivvi ja dat áigodat bistá vuosttaš vuossárgii maŋŋá nuppi beassášbeaivvi. Minsttarčikŋodat dálvedeahkain galgá leat 3 millimehtera. Dálvedeahkaid gummeseaguhus addá buoret geaidnocoavcci go geassedeahkain. Politiijabálvá Grønli muittuha ahte biilavuoddjis lea ovddasvástádus ahte biillas mainna vuoddjá lea doarvái buorre geaidnocoakci siivvu ektui.
Dálvedeahkaid bistináigi
Eai buot dálvedeahkat bistte nu guhká. Gumme dálvedeahkain masset dehálaš iešvuođaid go gollet, boarásmuvvet, guhkes gaskkaid dihtii dahje mo don vuoját. Go golbma jagi leat vássán, de berrešii dárkkistit deahkaid minsttarčikŋodaga ja kvalitehta. Go vihtta jagi leat vássán de berre lonuhit deahkaid, vaikko uhcan vuodjima dihte eai leat gollan nu olu.
Rávvagat biilavuoddjái
Seastinbáŋku 1 ja DNB dáhkádusfitnodat Fremtind vaháteastadeaddji Therese Nielsen muittuha ahte vuosttaš muohtasiivvu áigodagas leat eambbo biilavahágat go dábálaččat.
– Dárkkis kvalitehta ja agi dálvedeahkain ja lonut daid áigemunil. Vuoje siivvu mielde ja doalat buori gaskka dan biilii mii lea ovddabealde. Divtte giehtatelefovnna leat ráfis vuojedettiin, rávve Therese Nielsen preassadieđáhusas.
