Ruoŧa, Suoma ja Norgga davviguovlluid jođiheaddjit oaivvildit ahte lea áigi rahpat rájiid báikkálaš olbmuide.
Ruoŧa ja Norgga davviguovllu leanastivrajođiheaddjit ja fylkkamánnit ja sámi Lappi ja Davvi-Suoma regiovdnahálddašanlávdegottiid váldodirektevrrat deaivvadedje mannan vahkus.
Davvi-Suoma regiovdnahálddašanlávdegotti váldodirektevra, Terttu Savolainen, lei gohččon čoahkkimii, gos ovddasteaddjit čilgejedje koronadili riikkain ja mo gieđahallat epidemiija stáda regiovdnahálddašeaddji geahččanguovllus.
– Mis lea leamaš eará njoammundilli davvin. Čoahkkimis Davvi-Ruoŧa leanastivrajođiheddjiiguin ja Davvi-Suoma váldodirektevrraiguin geassemánu 12. beaivvi digaštalaimet koronadili davvin, gos bohte iešguđetlágan oaivilat rádjerahpama birra min guovlluin davvin, lohká Nordlándda fylkkamánni Tom Cato Karlsen ja Romssa ja Finnmárkku fylkkamánni Elisabeth Vik Aspaker preassadieđáhusas.
Unnán njommon davviguovlluin
Epidemiija čuohcan lea leamaš oalle ovttalágan Suoma, Norgga ja Ruoŧa davviguovlluin. Njoammunlohku rievddada guovllus guvlui, ja davviguovlluin ii leat lohku leamaš nu badjin dán radjái go lulde riikkain. Servodaga gidden lea váikkuhan davviguovlluid iešguđet ládje. Buot dábálaš lihkadeamit riikkaid gaskka leat bisánan, ja dan dili dihte konstaterejedje čoahkkinoasseváldit ahte dál lea áigi rahpat rájiid davviguovlluid báikkálaš ássiide.
– Fylkkamánni bargu lea doallat oppalašgova dili birra iežamet fylkkain ja dieđihit eiseválddiide dan birra. Maiddái ráđđehus ja našunála njoammuneastadaneiseválddit árvvoštallet dili ja makkár doaimmat ain galget leat jođus – ja maiddái goas lea dohkálaš rahpat rájiid ránnjáriikkaide, lohkaba Nordlándda fylkkamánni ja Romssa ja Finnmárkku fylkkamánni.
Vuhtii váldit regionála erohusaid
– Leanastivrajođiheaddjit, fylkkamánnit ja váldodirektevrrat bivdet vuhtii váldit regionála erohusaid go gáržžideamit mearriduvvojit, ja ahte dilli láhččojuvvo nu ahte Davvi-Suoma, Davvi-Ruoŧa ja Davvi-Norgga rádjerasttildeapmi jođáneamos lági mielde joatká nu go dábálaččat, čállet preassadieđáhusas.
