Háliidit muittašit vai ožžot evttohusaid mo jorbabeaivi galgá ávvuduvvot.
Háliidit muittašit vai ožžot evttohusaid mo jorbabeaivi galgá ávvuduvvot.
IBSS (Iinna ja biras sámiid searvi / Hinnøy og omegn sameforening) deavdá 40 jagi 2017:s. Danne áigot sii čohkket sihke boares ja ođđa miellahtuid albma muittašanboddui vai ožžot evttohusaid mo jorbabeaivi galgá ávvuduvvot.
– IBSS lea leamaš dehálaš sihke politihkalaččat ja kultuvrralaččat guovllu sámevuhtii. Searvvis lei erenoamáš dehálaš rolla sámi nuppástuhttináiggis 70-logu loahpageahčen ja 80-logu álggu geahčen, ja mii sáhttit dál čoaggit daid murjjiid bealdduin maid dalle leat gilván dadjá Runar Myrnes Balto preassadieđáhusas.
Bivdet veahki buohkain
Searvi háliida ávvudit dán historjjá 2017:s, ja sii bivdet veahki sis guđet leat leamaš mielde daid iešguđetge áigodagain dán 40-jagi. Sii váldet áinnas vuostá muitalusaid, dokumeanttaid ja govaid maid áŋgiruššit leat vurken.
– Sámediggepresideanta hálai ofelaččaid birra ođđajagisártnistis. IBSS historjjás leat ollu vearditmeahttun ofelaččat, ja mii háliidat sin ovdandoallat ávvudeami oktavuođas, dadjá Myrnes Balto.
Vilppastit ruovttoluotta
40 jagi čađa dáhpáhuvvá ollu buorre searveeallimis, muhto IBSS oaivvilda maiddái ahte lea miellagiddevaš vilppastit ruovttoluotta dehálaš nuppástusaide historjjás.
– Mun dieđán ahte leat máŋga sihke somás, dramáhtalaš ja miellagiddevaš muitalusat máŋgga áigodagas IBSS doaimmas. Mii háliidat áinnas muittašit buot daid, ja árvvoštallat ahte sáhttet go dat leat inspirašuvdnan ávvudeapmái 2017:s, dadjá Myrnes Balto.
Jurddabádji lea Vuomi giliviesus dii. 14.00 lávvardaga ođđajagimánu 16. b.
