Diet gažaldat man Ohppiidorganisašuvnna jođiheaddji jearai gieskat, dagahii digaštallama sosiála mediain. Boađus lea čoahkkin gos deaivvada Sámedikkiin ihttin.
Diet gažaldat man Ohppiidorganisašuvnna jođiheaddji jearai gieskat, dagahii digaštallama sosiála mediain. Boađus lea čoahkkin gos deaivvada Sámedikkiin ihttin.
Dát čoahkkin lea boađus das go Ohppiidorganisašuvnna (OO) jođiheaddji Kristoffer Hansen gieskat dajai Aftenposten áviisii ahte Norgga oahppoplánat leat spagga dievva ja oaivvildii dain fertet muhtin ráje sihkkut eret. Hansen árvalii de sihkastit earret eará osiid mat gusket álgoálbmot vuoigatvuođaide ja sápmelaččaid luonddugeavaheapmái.
Son lohká iežas ain oaivvildit dan seamma:
– Jua dan gal dagan, muhto háliidan dadjat ahte jáhkán olusat lohke dien boastut. Mun in eisege oaivvil ahte skuvllain galget oahppat unnit sápmelaččaid birra, muhto jearan ahte leago dehálaš oahppat dieid áššiid birra dieid fágain dieid áiggiin, leago ovdamearkka dihte dárbu oahppat sámi luonddugeavaheami birra luonddufágas 8. luohkás, vai sáhttá go dáid áššiid birra oahppat eará ládje, čilge son.
Hansen ádde ahte su cealkámušat provoserejedje olusiid.
– Muhto mun in sáva unnit oahppu sámevuođa ja sápmelaččaid birra, deattuha son vel oktii.
Čoahkkin boađus
Ohppiidorganisašuvnna jođiheaddji cealkámušat dagahedje digaštallamiid, erenoamážit sosiála mediain, ja ieš lohká dan leamaš buorrin.
– Boađus das han lei ahte bovdejuvvojin Sápmái, lohká son.
Sámediggeráđđelahttu Silje Karine Muotka lei oainnat okta dain guđet reagerejedje:
– Mun de digaštallen suinna sihke facebook ja twittera bokte, ja bovdejin su boahtit Sápmái beassat mii digaštallat dieid áššiid, ja ihttin de viimmat boahtá, muitala sámediggeráđđi Silje Karine Muotka, guhte illuda deaivat Ohppiidorganisašuvnna jođiheaddji.
Illuda oahppat eanet
Ohppiidorganisašuvdna dávjá mátkkošta miehtá riikka, galleda skuvllaid ja deaivvada ohppiiguin.
– Dát mátki dattege lea erenoamáš go dál beasan eanet oahppat sámi dili birra skuvllain. Olmmoš gullá olu, muhto dál beasan oaidnit mo dat duođaid lea. Mun sávan ahte mii, skuvllat, sámediggi ja ohppiidovddasteaddjit sáhttit digaštallat ja ovttasráđiid gávdnat čovdosiid daidda hástalusaide maid sámi oahppit vásihit, lohká Hansen.
(Ášši joatká gova vuolábealde)
Vuorkágovva: Marit Elin Kemi
Boahtteáigge skuvla fáddán
Sámediggeráđđelahttu Silje Karine Muotka muitala čoahkkimis šaddat sáhkan boahtteáigge skuvllas. Dat lei ge vuolggasadji gieskat go Hansen logaid oahppoplánaid leat menddo dievva, ja lei ge maid okta konklušuvnnain maid Ludvigsen lávdegoddi diibmá ovdanbuvttii iežas guorahallamis boahtteáiggi skuvllaid birra.
– Olusat lohket oahppoplánaid leat menddo dievvan, muhto fertet nannes sámi oahppoplánaid eat ge goaridit daid, lohká Muotka.
Golbma váldoášši
Muotka lohká iežas maid illudit beaivvi leat nuoraiguin fárrolaga, ja jáhkká joatkkaskuvllaohppiin boahtit miellagiddevaš gažaldagaid.
– Dákkár beaivvit lávejit addit ođđa vuoimmi, ealáskahttá maiddái «boares» politihkkár áhkku, čaibmá son ovdal go muitala maid áigu vuoruhit ihttin:
– Váldoáššit maid boađán ovdanbuktit leat ahte juohke oahppi galgá oažžut ávdnasiid maid bokte jokset oahppoplánaid ulbmiliid, nammalassii oahpponeavvuid. Nubbi ášši ges lea ahte juohke oahppis galgá leat buorre psykososiála biras árgabeaivvis, nuppiin sániiguin lea das sáhka givssideami eastadeamis. Dasa lassin diehttelasat ságastallat maid oahppoplánaid birra, čilge Muotka.
Prográmma:
08.00 Sámediggi ja OO deaivvadit rektoriin ja ohppiidráđiin Leavnnja joatkkaskuvllas iđitbiepmuide
08.30 Galledit Leavnnja joatkkaskuvlla. Fáddá: Skuvlafálaldat ja mo skuvla eastada ohppiid heaitimis skuvllas, erenoamážit olggobeale olbmuid
09.30 Vulget Kárášjohkii
10.45 Galledit Sámi joatkkaskuvlla Kárášjogas. Fáddá: Sámi skuvlafálaldagaid ja sámegieloahpahusa dilli
11.45 Borran Kárášjoga joatkkaskuvllas
13.00 Čoahkkin gaskkal Silje Karine Muotka, Sámedikki nuoraidpolitihkalaš lávdegotti ja OO
14.00 Váccašit Sámedikkis
