-Almmuhus-
OĐĐASAT- Dárbbaša áiggi sajáiduvvat, ii ge heaittihuvvot

– Dárbbaša áiggi sajáiduvvat, ii ge heaittihuvvot

-

-

Ná lohket sihke duodjeealáhusservviid ja Sámedikki bealis mentor- dahje hospiterenortnega mii lea oassin Duodješiehtadusas. Vaikko dán jagi leigga dušše  guovttis ohcan hospiterendoarjaga, de bealit oidnet dárbun joatkit ortnegiin. 

Dán jagáš duodješiehtadusas, man hálddaša ja ruhtada Norgga Sámediggi, lea oktiibuot 8,1 miljovnna. 300 000 ruvnno lea várrejuvvon mentor- ja hospiterenortnegii. Duojáriid ealáhussearvi ja Sámiid duodji searvi leat searvvit mat hábmejit Duodješiehtadusa sisdoalu álggos. Dasto galget soabadit Sámedikkiin buot osiid ektui. Jahki 2015 ii leat vuos nohkan ja Duodješiehtadus lea ain fámus, muhto duodjeealáhussearvvit ráhkkanit jo boahtte jahkái ja vuolláičálle duodješiehtadusevttohusa man bušeahttaevttohus  lea 11,7 miljovnna ja mentor- dahje hospiterenortnegii duodjesearvvit leat háliidan 600 000 ruvnno, mii lea beali stuorát go dán jagáš bušeahtas várrejuvvon dasa Sámedikkis.  

 

Eará go duodjeoahpahalliortnet

Duojáriid ealáhussearvvi miellahttu Marit Guttorm Graven. Govven: Avvira vuorkágovva.

Vaikko gávdno sierra duodjeoahpahalliortnet de Duojáriid ealáhussearvvi miellahttu lohká stuorra dárbbu hospiterenortnegii.
– Oahpahalli ordnet lea čatnon joatkkaskuvlii ja lea ollu viidát go hospiteren ordnet. Hospiteren ordnet lea áibbas eará danne go ii čatná skuvlii. Váldoerohus  lea dat ahte hospiteren ordnet veahkeha duojáriidda loktet gealbbu ja máhtu juste dan duodjesuorggis maid duojár sávašii loktet dahje oahpat. Ii ge bistá eambbo go golbma mánu oahpaheapmi eará duojára luhtte, čilge Duojáriid ealáhussearvvi miellahtu  Marit Guttorm Graven.  

 

Unnidit supmiid   
 Sámedikki bealis duođaštit ahte dán jagáš Duodješiehtadusa hospiteren ortnet ii lean nu bivnnut.

– Dassážii leigga guovttis ohcan dán ortnetdoarjaga. Soai leigga nuorra olmmoš ja viđalotjahkásaš olmmoš, muitala Sámedikki ealáhusjuhkosa fágajođiheaddji John Osvald Grønmo.    
 Duodješiehtadus 2015 lea fámus gitta dán jagi juovlamánu 31. beaivái. Duodješiehtadusa 2016 ekonomalaš rámmaid ja juogadeami fápmuda Sámedikki dievasčoahkkin juovlamánus.   

Sámediggeráđi miellahttu Silje Karine Muotka. Avvira vuorkágovva.

– Mis lea, evttohuvvon Duodješiehtadusa 2016 ektui, ovttaoaivilvuohta duodjeservviiguin. Mii soabadeimmet ahte hospiterenortnegii várret 200 000 mii lea unnit go dán jagáš bušeahtas, ja muđui ge olles Duodješiehtadusa boahtte jagi bušeahtta unnu. Boahtte jahkái evttohit 7,9 miljovnna ruvnno, čilge Sámediggeráđi bealis Silje Karine Muotka.

Unnideapmái váikkuhit Norgga ráđđehusa bušeahttajuolludeamit sámi doaimmaide, muhto ii dušše dat.
– Mii leat gávnnahan ahte mii galgat doarjut eará duodjedoaimmaid nu mo ovdamearkka dihte Sámediggeráđđi lea juolludan 500 000 ruvnno Sámiráđi bargui man dat lea álggahan Sámi duoji gálvo- ja kvalitehtamearkka ođasmahttimiin. Dasa lassin jahkásaččat Sámediggi ruhtada Duodjeinstituhta doaimmaid, muitala Muotka.

 

Ii vuos sajáiduvvan
Lea nubbi jahki go hospiteren- dahje mentorortnet lea oassin Duodješiehtadusas. Duodješiehtadus 2016 lea goalmmát jahki. Sihke Sámedikkis ja Duodjeealáhusservviin lea ovttaoaivilvuohta das ahte ortnet ii leat vuos sajáiduvvan.

Soaitá ahte olbmot eai dieđe vuos. Juohke ođđa diŋga dárbbaša áiggi sajáiduvvat, muitala Duojáriid ealáhussearvvi miellahttu Marit Guttorm Graven.

Seammás ávžžuha son olbmuid atnit vejolašvuođa ohcat dakkár doarjaga. Sámedikki bealis Silje Karine Muotka lea ovttaoaivilis Graveniin.

– Dieđus, go dát ordnet lea áibbas ođđas, de ádjána veahá ovdal go dát sajáiduvvá, ja mii oaidnit dán ortnega hui dehálažžan. Danin lea dehálaš joatkit dainna ortnegiin vaikko eai leat vuos beare galle geavaheaddji. Soitet muhtumat fuomášit juste dál ohcat dan. Daid dieđuid gávdná min neahttasiiddus ja maiddái duodjeealáhussearvvit galget fievrridit dieđuid iežaset miellahtuide, čilge Sámediggeráđi miellahttu Silje Karine Muotka.   
 
Árvu
Duodjeealáhusservviid oainnus lea dán hospiterenortnegis alla árvu.
– Mis ledje iskkadeamit ovdal go hospiterenortnet šattai oassin Duodješiehtadusas. Dát iskkadeamit čájehedje ahte olbmuin lea beroštupmi dakkár ortnegiidda. Dávjá olbmot ohcalit dakkáriid. Dá lea maiddái juoga man bokte mii atnit divrrasin vuorrasit duojáriid máhtu, danin go nuorat dat galget oahppat vuorrasit olbmuin eanet duddjot. Eai ge dušše nuorat, muhto muđui earát. Hospiterenortnet lea lassi ruđalaš doarjja sihke vuorrasit duojárii ja dasa gii sávašii loktet máhtu, čilge Marit Guttorm Graven.        

 

-Almmuhus-