Bearalváhki lea dat gielda Norggas gos lea leamaš eanemus neahttagávppašeapmi juohke ássi nammii dán jagi vuosttaš golmma mánus.
Bearalvági ássit gávppašedje 50 proseantta eambbo neahta bokte go gaskamearálaš norgalaš, ja de lea Beardu nubbin – 33 proseantta eambbo go gaskamearálaččat, ovdal Várggáid gos gávppašedje 29 proseantta eambbo go gaskamearalaš norgalaš.
Čáhcesullo ássit ges gávppašedje neahttagávppiin 53 proseantta unnit go gaskamearálaš norgalaš, dán jagi ođđajagimánus njukčamánnui, ja lea dat gielda fylkkas gos gávppašedje unnimusat neahta bokte.
Maiddái Kárášjogas, Guovdageainnus ja Deanus gávppašedje ássit birrasii 40 proseantta unnit neahta bokte go dan maid gaskamearalaš norgalaš dagai seamma áigodagas.
Romssa ja Finnmárkku ássit gávppašedje eanemusat valáštallan- ja astoáigegálvvuid namuhuvvon áigodagas, čájehit guorahallanlogut maid Klarna lea almmuhan.
