-Almmuhus-
Featured box1Goddon ealga lei ain liekkas go gávdnui: – Luodda lea buot varran ja...

Goddon ealga lei ain liekkas go gávdnui: – Luodda lea buot varran ja guolgan

-

-

Lei kárášjohkalaš Daniel Eikjok gii gaskavahkku gávnnai jápmán ealgga Iškorasgeainnus Kárášjoga márkana lulábealde. 

Iškorasgeainnu alde vuhtto bures ahte guovža lea guhká dorron ealggain ovdal biđii dan goddit. 

– Álggos oidnen dušše guolggaid ja ahte lei buot varran. De fuomášin das geaidnoguoras ealgga veallut. De gal árvidin dakkaviđe mii dás lea geavvan, muitala Daniel Eikjok. 

ČÁJEHA GOVAID DRAMATIHKAS: Daniel Eikjok čájeha govaid ealggas mii goddui guvžii: Govva: Josef Isak Utsi
ČÁJEHA GOVAID DRAMATIHKAS: Daniel Eikjok čájeha govaid ealggas mii goddui guvžii: Govva: Josef Isak Utsi

Dorron guhká

Eikjok lohká ealga lei ain liekkas, nu ahte ferte leat geavvan veahá ovdalaš go son bođii dasa. Lohká bures vuhttot ahte guovža lea guhká dorron ealggain ovdal biđii dan goddit.

– Orro dan láhkai ahte lea meahcis fallehan ealgga, ja nu leaba dorron gitta geainnu ala. Ealga lea dorron guovžžain sullii 50 mehtera geaidno ráigge. Luodda lea buot varran ja guolgan dan gaska, ja vuhtto gazzaluottain ahte ealga lea viggan cakkadit ovdal geavai vuollái, muitala Daniel Eikjok.

Veahá borran

Son muitala ahte ealga lei nu aitto goddon ahte guovža ii lean háhppehan olus borrat vel.

– Lei dušše čalmmiid birra borran ja olloliin bierggu. Lean ovdal vásihan ahte guovža álggos doalvu oaivvi ealggas, muitala Daniel Eikjok. 

BORRAN: Guovža lea borran oaivvi maŋŋel go gottii ealgga. Priváhtagovva
BORRAN: Guovža lea borran oaivvi maŋŋel go gottii ealgga. Priváhtagovva

Gullui vuovddis

Guovžžat leat ge maŋemus áiggiid laskan ja Daniel Eikjok, gii ieš lea ealgabivdi, lohká ahte giđđat lea ealga váldoniesti guvžii. Danne ii imaš nu beare haga go guovža gottii ealgga, muhto veahá erenoamáš go jur geainnu ala gottii. 

Loga maid:
Logi eanet guovžža Norggas

– In iskan makkár ealga lea, muhto lea rávis ealli. Árvideames njiŋŋelas. Dát čájeha ahte guovža lea gievrras boranávdi. Go ledjen das, de gullen juoidá vuovddis. Eai lean goit lottit. Lean measta áibbas sihkar ahte lei guovža, nu ahte das gal vulgen eret. Ii orron miella deaivvadit das gal guovžžain, reaškkiha ieš. 

GAZZASAJIT: Dát gazzasajit muitalit ahte ealga geavai guovžžagaccaid gaskii. Priváhtagovva
GAZZASAJIT: Dát gazzasajit muitalit ahte ealga geavai guovžžagaccaid gaskii. Priváhtagovva

Háliidii filbmet

Son liikká ii máššan vuolgit das eret dakka viđe, go háliidii filbmet guovžža jus datte boahtá borrat ealgga.

– Mannen alážii mii lei veahá dobbelis. Das lei várddus oaidnit go guovža boahtá. Ledjen válmmas filbmet, muhto ii dihtton. Ledjen das moadde diimmu, muhto jáhkán dat bođii go mun mannen, lohká Daniel Eikjok. 

SNO áigu iskat

Stáhta luonddubearráigeahču (SNO) boranávdeáššedovdi, Magne Asheim, lohká iežaset vuolgit báikái geahččat.

– Midjiide dieđus lea miellagiddevaš iskat dan, ja erenoamážit sihkkarastit DNA-iskosiid guovžžas. Danne vuolgit dohko, dadjá Asheim.

Ii ávžžut olbmuid mannat dohko

Magne Asheim ii ávžžut olbmuid mannat «guovža-safariijai», go das leat máŋga heajos beali.

– Vuos álggos dat ahte sáhttá leat njuolgut váralaš jus beare lahka boahtá guovžža. Dat han háliida várjalit iežas biepmu. Nubbi lea ges dat ahte guovža hárjána olbmuide ja loahpas ii šat bala. De sáhttá geavvat nu ahte šaddat báhčit guovžža, jus šaddá beare jállu, lohká Asheim. 

-Almmuhus-