Dán vahkku ožžot studeanttat ja oahppit máksojuvvot stipeandda sihke cuoŋománu, miessemánu ja geassemánu ovddas Loatnakássas.
Máksojuvvo golbma beaivvi maŋŋálaga studeanttaide.
– Lean ilus go leat ožžon dákkár čovdosa. Dat dagaha ahte studeanttat, geat leat massán bargguset ja lassesisaboađu koronadili geažil, sis lea ruhta máksit orruma ja birgengoluid dál. Dat veahkeha reaidaruhtadillái oanehit áigái, dadjá Loatnakássa hálddáhusdirektevra Nina Schanke Funnemark preassadieđáhusas.
Máksojuvvo golbma beaivvi
Buot studeanttat ja oahppit, geat galget oažžut stipeandda cuoŋománus, miessemánus ja geassemánus, ožžot dán vahkku oktasaš máksima dán golmma mánu ovddas. Ollesáigge studentii dahká dát 27 550 ruvnno mii máksojuvvo dán vahkku. Máksin juhkkojuvvo golmma beaivái.
– Vai ruhta galgá máksojuvvot jođánit ja sihkkareamos lági mielde, de fertet dahkat dan golbma beaivvi maŋŋálaga, dadjá Funnemark.
Liigeloatna
Ráđđehus lea maiddái mearridan ahte studeanttat, geat leat massán oasseáigebargguid ja lassesisaboađu koronadili geažil, sáhttet ohcat 26 000 ruvnno liigeloana Loatnakássas. Eaktun lea ahte studeanttat sáhttet duođaštit ja dokumenteret ahte sii leat massán sisaboađu koronadili geažil.
