-Almmuhus-
OĐĐASATDán skuvllas givssi­duvvui juohke viđát mánná 7. luohkás

Dán skuvllas givssi­duvvui juohke viđát mánná 7. luohkás

-

-

Ovddeš mánáidskuvllas ii leat báhcán go unna oasáš šat, gos dál čájehuvvo leat ovtta skuvlajagis juohke viđát mánná 7. luohkás givssiduvvon mannan jagi.

Guovdageainnu skuvllas lea Ávvir čállán ovdal ahte lea leamašan olu givssideapmi. Liikká ii leat muittus dilli leamašan nu vearrái go dál čájehuvvo Guovdageainnu mánáidskuvllas diimmá skuvlajagi leamašan.

Logut, maid Guovdageainnu suohkan lea almmuhan ođđa raporttas «Guovdageainnu vuođđoskuvllaid dilálašvuođaraporta skuvlajagi 2020-21» leat duođalaš logut givssideami dáfus.

Juohke viđát mánná

Raporttas almmuhuvvo  ahte 20,6 proseantta mánáin, dahje juohke viđát mánná, 7. luohkás givssiduvvui 2020/21 skuvlajagi.  Vuođđu raportii lea  jearahallanskovvvi, mas juohke viđát 7. luohká mánná lea vástidan son givssiduvvo skuvllas.

Jus dan logu buohtastahttá muđui riikka mánáiguin ja Oahppodirektoráhta (Udir) iežas loguiguin, de givssiduvvojedje 5,8 proseantta mánáin vuođđoskuvllas 2020 ohppiidiskkadeami vuođul.

– Dat leat oba duođalaš logut, maid mun in leat goit gullan ovdal go dál go raporttas bođii ovdan. Ovddidin maid suohkanstivrras ahte lea dehálaš raporttaid oažžut hálddahusas jus mii áirasat galgat sáhttit dahkat maidege dainna áššiin, lohká Guovdageainnu suohkanstivrra Johttisápmelaččaid listtu (JSL) áirras, Berit Marie P. E. Eira.

HIRPMÁSTUVVAN: Guovdageainnu suohkanstivrra Johttisápmelaččaid listtu áirras, Berit Marie P. E. Eira, lea hirpmástuvvan das makkár givssidanlogut Guovdageainnu skuvllas leat. Govven: Máret Elin Kemi (vuorkágovva)
HIRPMÁSTUVVAN: Guovdageainnu suohkanstivrra Johttisápmelaččaid listtu áirras, Berit Marie P. E. Eira, lea hirpmástuvvan das makkár givssidanlogut Guovdageainnu skuvllas leat. Govven: Máret Elin Kemi (vuorkágovva)

Oahpaheaddjit jávkan

Guovdageainnu suohkanstivrras mannan duorastaga muitalii Guovdageainnu suohkana bajásšaddan- ja kulturovttadaga suohkanjođiheaddji, Bodil Utsi Vars, ahte skuvllas lea oahpaheddjiid gaskkas olu jávkan leamašan diimmá jagi, ja dat sáhttá leat okta dain ákkain.

Ávvir ii lihkostuvvan oažžut Utsi Vars ságaide ášši olis.

Berit Marie P. Eira oaivvilda ahte ii leat nu rámidan veara bargu mii lea dahkkon suohkana bealis givssidanáššiin.

– Mus leat mánát leamašan skuvllas 30 jagi, ja mu mielas ii leat amas ášši ahte doppe givssiduvvojit mánát.  Mun in dieđe sáhttá go dušše dainna čilget ahte oahpaheaddjit leat jávkan mannan jagi, ahte dat lea ágga. Mun gal dál gaibidan ahte suohkana hálddahus dás maŋás dávjjibut buktigoahtá dieđuid suohkanstivrii das movt mánáin lea skuvladilli, lohká son.

– Go juohke viđát mánná givssiduvvo, dan gal ferte muhtun diehtán ovdal go dát raporta almmuhuvvui, lohká son.

Arvat badjelis riikadási

Raporttas maid boahtá ovdan ahte 13 proseantta Guovdageainnu nuoraidskuvlla 10. luohká mánáin vástidit ahte sii givssiduvvojit. Dat lea maid arvat badjelis go riikadásis, gos leat 5,8 proseantta geat givssiduvvojit Udir loguid mielde.

EAI GALGGA BALLAT: Guovdageainnu suohkanstivrra Bargiidbellodaga áirras, Mikkel Ailo Gaup, lohká ahte mánát eai galgga ballat skuvlii vuolgimis. Govven: Iselin Skum (vuorkágovva)
EAI GALGGA BALLAT: Guovdageainnu suohkanstivrra Bargiidbellodaga áirras, Mikkel Ailo Gaup, lohká ahte mánát eai galgga ballat skuvlii vuolgimis. Govven: Iselin Skum (vuorkágovva)

Bargiidbellodaga suohkanstivrra áirras, Mikkel Ailo Gaup, lei hirpmástuvvan go loguid oinnii.

– Mánáin galgá oadjebas dilli skuvllas. Logan juo ahte nu ii sáhte leat ahte mánát ballet skuvlii vuolgimis. Mu mielas lea váidalahtti go dakkár dilli lea min skuvllas, inge mun leat gullan maidege dan birra ovdalaččas ovdal go raporta almmuhuvvui golggotmánus ja dal ovdanbuktui suohkanstivrii, lohká son.

Ávvir čuovvola ášši.

-Almmuhus-