Tuollodirektevra illuda go nu oallusat háliidit šaddat tuollárin. Dán jagi fállojuvvo oahppu vuosttaš gearddi bachelorgráda dásis.
Dán jagi álggahuvvo bacheloroahppu tuollofágas Stavanger universitehtas. Oahppu lea nubbin bivnnuheamos Norggas, 2064 olbmo leat ohcan 35 oahpposadjái. Dušše Norgga gávpeallaskuvlla sivilaekonomiijaoahpus leat eanet ohccit. Das leat 2221 ohcci 500 oahpposadjái.
– Lea máilmmi buorre go ná oallugat háliidit gazzat tuollároahpu. Mis lávejit álo olu buori ohccit Tuolloetáhta siskkáldas ohppui, ja leimmet ge hui gealdegasas ođđa bacheloroahpu ektui, lohká tuollodirektevra Øystein Børmer.
Čalmmustahttán tuolloetáhta
Etáhta lea maŋimuš jagiid bargan čalmmustahttit Tuolloetáhta bargoaddin. Sii leat earret eará searvan TV-ráidui ja dasa lassin leamaš erenomáš fokusa sihkkarvuhtii ja gearggusvuhtii maŋŋel go pandemiija leavai.
– Go ná oallugat ohcet tuollárohppui, de dat mearkkaša ahte leat lihkostuvvan. Mii dárbbašit eanet tuolláriid maiddái boahtte áiggis, dadjá Børmer.
Tuollo, gálvofievrrideami ja rádjabearráigeahču bacheloroahpu váldofáttát leat juridihkalaš fága, gávpefága, dutkan, dearvvašvuohta, biras ja sihkkarvuohta, psykologiija, kultur- ja servodatfága, konfliktagieđahallan ja logistihkka. Oahpu oktavuođas čađahit studeanttat jahkebeali bargohárjehallama. (©NTB)
