Dan Jonas: – Lea stuorámus giellalávgun munnje

-

– Mađi eanet iešguđet sámegielsuopmaniid gulan, dađi eanet ipmirdišgoađán maid earát dadjet, dadjá Dan Jonas Sparrok Giellabiellje konferánssas mii lea oalle giellalávgun sutnje.

Dan Jonas Sparrok (27) Snåsas eret lea vuohččan dákkár giellakonferánssas gos ná máŋga sámi suopmana leat čoagganan seammá báikái.

– Lea hui somá oaidnit máŋggabealatvuođa ja somá go gielddasámegiella ja bihtánsámegiella maid gullo dáppe. Konferánsa lágiduvvo oarjelsámegillii, julevsámegillii ja davvisámegilli ja lea šaddan hirbmat giellalávgun munnje dáppe, lohká Dan Jonas Sparrok Ávvirii.

Eanet dustet sámástišgoahtit

Son lea konferansaláidesteaddji Giellabiellje konferánssas, ja lohká departemeanta su bovden Bådåddjoi leat konferansaláidesteaddjin go lea leamaš ovdal sámi ofelaš. 

– Mii mannat rivttes guvlui ja olbmot dustet eanet sámástit. Lean bajásšaddan oarjelsámi giellalávgumiin mii maid dieđusge lea buorre, muhto lea maid buorre oahppat eanet nubbi nuppis dákkár giellalávgumis ja digaštallat hástalusaid birra mat leat miehtá Sámis. Das oažžu maid stuorát perspektiivva gullat movt ránnjáriikkain lea gielladilli, lohká Sparrok.

VÁILLAHIT EANET NUORAID: Eli Máret Kappfjell (16) Romssas eret ja Julia Paulsen (16) Divttasvuonas eret livččiiga sávvan eanet nuoraid searvat dán lágideapmái. Govven: Anne Gro Gaup
VÁILLAHIT EANET NUORAID: Eli Máret Kappfjell (16) Romssas eret ja Julia Paulsen (16) Divttasvuonas eret livččiiga sávvan eanet nuoraid searvat dán lágideapmái. Govven: Anne Gro Gaup

Váillaheaba sudno agi nuoraid

Eli Máret Kappfjell ja Julia Paulsen leaba mielde konferánssas ja lohkaba dehálažžan deaivvadit eará nuoraiguin geat leat boahtán Bådåddjoi. Erenoamáš somá lei go DJ Idja dollestii minikonseartta.

– Galggašedje leat eanet nuorat munno agis searvat dákkár lágideapmái. Moai letne dušše guovttá fárrolaga leamaš dáppe, dadjába measta oktiinjálmmiid. Mokta lea buorre ja leaba čuvvon oasi lágideamis.

– Lei hui gelddolaš oaidnit Kevin Chan go čájehii Metabrillaid movt dat doibmet, čilgeba Eli Máret Kappfjell guiovttos Julia Paulseniin.