-Almmuhus-
OĐĐASATDán jagi šaddá golle­finála Sámi Grand Prixas

Dán jagi šaddá golle­finála Sámi Grand Prixas

-

-

Dán jagi leat Sámi Grand Prix lágideamis veaháš rievdadeamit. Juoiganoasis leat dušše guhtta gilvaleaddji, ja goappešat luohkáin šaddá gollefinála. 

Sámi beassášfestivála buvttadeaddji Ol-Johan Gaup muitala ahte okta stuora ođas dán jagi lea ahte buot lávlagat ja luođit, mat leat mielde Sámi Grand Prix 2022:s, almmuhuvvojit Spotifyi ovdagihtii.

– Mii leat rievtti mielde háliidan dan dahkat ovdal. Ovddit jagiid mii leat ovdagihtii almmuhan moatti sekundda bihtážiid lávlagiin ja luđiin. Dat oasážat eai leat leamaš válmmasin buvttaduvvon, dat ledje dušše demo-hámis maid mii leimmet ožžon. Dál mii leat válmmasin buvttadan buot lávlagiid ja luđiid, ja mii leat bádden studios buohkaid, muitala Gaup.

Besset ráhkkanit SGP sáddagii

Gaup lohká Beassášfestivála geahčadan movt eará guovlluin leat dahkan dakkár gilvvuid oktavuođas, ja namuha earret eará ahte Norgga Melodi Grand Prix almmuha buot lávlagiid ovdagihtii ja Melodifestivalen Ruoŧa bealde almmuha lávlagiid seamma beaivvi.

– Mii válljet ovdagihtii almmuhit juigiid ja artisttaid go dat lea somá ja olbmot besset de illudit oaidnit ja gullat daid artisttaid ja juigiid Sámi Grand Prix lávdde alde. Geahččit ja guldaleaddjit besset dal ovdagihtii gávdnat iežaset jiellatlávlaga ja -juoigi, ja ráhkkanišgoahtit doarjut su.

Dán jagi besset geahččit jienastit iežaset jiellatlávlu ja -juoigi Sámi Grand Prix sáddaga vuolde.


Unnit sáddenáigi

Eará rievdadus Sámi Grand Prixas lea ahte dán jagi leat unnit juoigit mielde go ovdal leat leamaš. Ovdal leat logi juoigi beassan searvat, dán jagi eai leat go guhtta. Gaup lohká sivvan dasa leat go sátta sáddejuvvo TV:s, de lea oanehit sáddenáigi man mielde ferte heivehit sáddaga.

– Sámi Grand Prix láve dábálaččat bistit guokte diimmu Bákteharjjis, muhto go TV:s sáddejuvvo, de ii leat liikká guhkes sáddenáigi. Dan dihte fertiimet ráddjet ja bidjat seamma meari juigiid go artisttaid. Dat lea min mielas vuogas čoavddus ja olbmuide ipmirdahtti go leat liikká máŋggas goappaš oasis.

Dat guokte artistta ja juoigi geat oažžuba eanemus jienaid goappáge gilvalanoasis mannaba viidáseappot gollefinálii. Gollefinálas ovdanbuktiba goappaš artisttat ja goappaš juoigit ođđasit iežaska lávlaga ja luođi. Dan guovtti gaskkas galgá de juoiganoasi ja lávlunoasi vuoiti jienastuvvot.

– Dat rievdadusat leat dihtomielalaččat hábmejuvvon ja mii sávvat ahte rievdadusat dahket ahte lea somá ja gelddolaš olles sáddaga geahččat. Mii leat oaidnán vejolašvuođaid movt Sámi Grand Prix sáhttá šaddat vel ain buoret ja somát geahččat. Muhto mii dáidit buohkat dovdat Sámi Grand Prixa nu movt láve leahkit. Mii beassat gullat ođđa lávlagiid ja luđiid, ja muhtun ođđa artisttaid ja juigiid. Juste dat lea ge leamaš SGP ceavzilisvuohta go lea seamma prinsihppa leamaš jagis jahkái, muhto álot lea goitge juoga ođas, dadjá buvttadeaddji Ol-Johan Gaup.

Ihttin, lávvordaga diibmu 22.10 almmuhuvvojit buot artisttat ja juoigit NRK1 TV-kánalas.

-Almmuhus-