Beakkálmasa bokte loktejit beroštumi sleđggonii. Therese johaug lea dán jagáš Trygg Trafikk designar.
Dán jagáš Trygg trafikk šleđggondesignar lea gearggus. Sii leat ovttasbargan Norggariikkajoavkku čuigiin, Therese Johaugain ja su fitnodagain Johaug.
Ovttas sii leat hábmen šleđggona lášmes davviriikkalaš designan.
Sávvá eambbogiid geavahit sleđggona
Johaug šleđggondesigna galgá dán jagi gáddjut heakkaid. Trykk trafikk ja Fremtinddáhkádus almmuhit juohke jagi šleđggondesigna ođđa beakkálmasain dahje dáiddáriin. Dán jagi lea Therese Johaug njunnošis. Ovdal leat earret eará Kygo, Pushwagner, Magne Furuholmen ja Kari Traa hábmen šleđggoniid.
– Hárjehalan sihke eahkes ja ovdal čuovganeami, dieđán man dehálaš lea geavahit šleđggona. Šleđggon geavaheapmi lea buot buoremus vuohki leat oidnosis, ja dainna mun dovddan oadjebassan hárjehallamiin. Sávašin šleđggondesigna ja šleđggonbeaivvit dagahit ahte eambbosat álget geavahit šleđggona, dadjá Therese Johaug.
Lášmat ja movtta – nugo designar
Johaug viežžá inspirašuvnna luonddus, juoidá masa designajoavku lea liikon. Dán jagaš fáddá lea meahci diamántta, bihcebáhce.
– Lea somá almmuhit ođđa šleđggona, dál go čakča ja sevdnjes áigi lea boahtán. Liige somá lea go designa sáhttá čanastit designerii. Johaug- šleđggon lea lášmat ja movttiidahtii, seammás go lea hui áigeguovdil ja čaffat go inspirašuvdna lea vižžon Norgga luonddus, dadjá Trygg Trafikk gulahallanhoavda ŠIngrid Trømborg
leđggona oaččut ruoná, alit ja sáhppes ivnnis, áigeguovdilis designa dagaha ahte šleđggon lea heivehuvvon mánáide ja ollesolbmuide.
Muitte šleđggonbeaivi
Trygg Trafikk ja Fremtinddáhkádus barget aktiivvalaččat loktet šleđggona dehálašvuođa. Golggotmánu 17.beaivvi lea Norggas šleđggonbeaivvi. Mihttu beivviin lea oažžut mánáid, nuoraid ja ollesolbmuid geavahit šleđggona, vuoi eastadivčče bárttiid.
– Buoremus vuohki hehttet bárttiid seavdnjadis, lea geavahit šleđggona. Mii jáhkkit ja doaivut ahte ovttasbargu beakkálmasaiguin ja dáiddáriiguin veahkeha čalmmustahttit dan dehálašvuođa šleđggonis, dadjá Fremtinddáhkkádus eastadeaddji, Therese Nielsen.
