-Almmuhus-
KULTUVRADán jagáš Riddu Riđu nuorra dáiddár gearggus slam-poesiijain

Dán jagáš Riddu Riđu nuorra dáiddár gearggus slam-poesiijain

-

-

Sámegielat slam-poehta Ánná Káisá Partapuoli lea válljejuvvon Riddu Riđu 2018 nuorra dáiddárin. Partapuoli lea ilus ja gealdagasas.

– Nammaduvvot dán jagi nuorra dáiddárin lea munnje stuorra gudni ja mearkkaša munnje hui ollu. Mun sávan ja jáhkán dát jahki sáhttá rahpat ođđa uvssaid munnje, ja leat jorggáldahkan mu dáiddalaš karriearas. Lean jo bures boahtán johtui ráhkkanemiiguin festiválii, ja illudan sakka sihke geassái ja boahttevaš jahkái, dadjá Ánná Káisá Partapuoli.

Dán jagi nuorra dáiddár nammasaš árvonammadeapmi lea oassi Riddu Riđđu Festivála dáhtus čalmmustahttit nuorra sámi dáiddáriid ja láhčit sidjiide vejolašvuođa ovdánit iežaset attáldagaiguin ja beassat oidnosii riikka ja olgoriikka dásis.

Ovttasráđiid ásahusain SpareBáŋku 1 Davvi-Norgga Kulturealáhusvuođđudusain juhkkojuvvo nuorra dáiddárii 25 000 ruvnnu sturrosaš stipeanda.

 

Ovdánahttit ja hábme sámi girjjálašvuođa

Ánná Káisá Partapuoli  lea 23 jagi boaris, lea bajásšaddan Skániin ja Sohpparis, muhto ássá dáid áiggiid Romssas gos gazzá lektoroahpu.

Son lea čállán divttaid ja lávlagiid olles eallenagi, maŋimuš jagiid lea dovdan ahte háliida vejolašvuođa ovdanbuktit iežas čállosiid ja ovdánahttit ja hábmet sámi girjjálašvuođa, čállá Riddu Riđđu preassadieđáhusastis.

– Ánná Káisá Partapuoli lea nuorra girjjálaš taleanta guhte hirpmahuhttá dainna vugiin mo son bidjá iežas sámi servodahkii, seammás go oaidná ja kommentere siskkáldasat servodagas, dadjá Riddu Riđu festiválahoavda Karoline Trollvik.

 

Inspirašuvnna viežžá vaikko gos

Partapuoli viežžá inspirašuvnna čállosiidda sámi eallimis, sámi servodagas ja boazodoalus.

Sus leat ollu politihkalaš čállosat maiddái ja sutnje lea dehálaš loktet sámegiela ja erenoamážit duortnussámi suopmana árvvu ja geavaheami.

Slam-poehtan háliida son čájehit ahte maiddá sámegielain lea vejolaš čállit riimmaid, ja ahte divttat sáhttet leat illun ja movttiidahttin nuorra sápmelaččaide.

-Almmuhus-