Dán jagáš nuorra boazosápmelaš 

Journalista

Odne geigejuvvui «dán jagáš nuorra boazosápmelaš» -bálkkašupmi NBR riikačoahkkimis.

Fávrrosorda orohaga boazosápmelaš Johan Máhtte J. Eira (21) vuittii NBR «dán jagi nuorra boazosápmelaš» bálkkašumi. 

– Stuora gudni. Dahká olbmo hui movttegin go oidnet dan unnánačča maid barggan ja orru veahkeheamen ahte earát maid arvet álgit bargat bohccuiguin, dadjá Eira Ávvirii. Son muitala ahte boazodoallu mearkkaša visot sutnje, iige lean sáhttit eará barggu bargat.

– Boazodoallu lea mu eallin. Ii sáhte gohčodit ge bargun, go boazoealáhus lea eallinvuohki. Ii leat diibmobálká, iige leat dihto bargoáigi, dadjá son. 

Somámus go miesit šaddet

Johan Máhtte J. Eira muitala ahte son lea hui olu meahcis, ja buot somámus lea oaidnit go miesit šaddet. 

– Somá lea oaidnit iežas bohcco guoddit, ja čuovvut miesi. Boazodoallu lea dan láhkai ahte lea hui somá beassat leat meahcis, ja lea hui  buorre munnje. In oainne eará bargovejolašvuođa go boazodoalu, dadjá son. Eira lohká ožžon hui olu ávkkálaš biergasiid, nu go suohpana ja diploma maid sáhttá muittašit go vuittii «dán jagi nuorra boazosápmelaš» -bálkkašupmi. 

Ledje eanandoallo- ja biebmoministtar Geir Pollestad, NBR jođiheaddji Inge Even Danielsen ja bohccobierggu márkanlávdegotti Johan Anders Lifjell geat geigejedje bálkkašupmi riikačoahkkimis. NBR nuoraidlávdegoddi lei nammadan čieža evttohusa, ja maŋemuš go bálkkašupmi juhkkui lei 2019:s.