-Almmuhus-
OĐĐASAT – Dán hearkkes dilis šaddá vel losit lohkat negatiiva áššiid sosiála median

– Dán hearkkes dilis šaddá vel losit lohkat negatiiva áššiid sosiála median

-

-

NSR stivrrajođiheaddji Runas Myrnes Balto ávžžuha olbmuid čájehit verddevuođa

NSR riikkastivra ávžžuha olbmuid čájehit gierdavašvuođa ja áddejumi boazodollui dán heahtedilis ja goavvejagis. NSR stivrrajođiheaddji Runas Myrnes Balto dadjá ahte lea áigi čájehit verddevuođa. 

– Dqn earenomáš hearkkes dilis šaddá vel losit lohkat negatiiva áššiid sosiála mediain, dadjá Myrnes Balto. 

Norgga Sámiid Riikkasearvvi (NSR) riikkastivra lea vuorjašuvvan go olu boazosámit šaddet sihke koronadávdda ja goavvedálvvi gieđahallat oktanaga. Dal čállet sii cealkámuša gos ávžžuhit olbmuid čájehit verddevuođa. NSR stivrrajođiheaddji Runas Myrnes Balto dadjá ahte boazoealáhus lea earenomáš dilis ja lea deaŧalaš čájehit gierdavašvuođa ja áddejumi boazodollui.

– Min leat ožžon raporta ahte doppe lea veahá cielaheapmi. Dakkár cielaheapmi lea dávjá čadnon skutermáđijaide ja go daid leat gidden ja olbmot beahtahallet. De sii dávjá lávejit čállit negatiiva kommentáraid sosiála mediain boazoealáhusa birra.  

Fargga beassážat 

Myrnes Balto dadjá ahte sii háliidit dan cealkámušas oažžut olbmuid jurddašit dan erenomáš heahtedili mas boazoealáhus lea dal ovdal go almmuhit negatiiva čállosiid ealáhusa birra.

–  Dál han leat fargga beassážat ja olbmot leat plánen vuolgit skutermátkkiide ja de fuobmájit ahte ii mana dán giđa dego leat plánen. Go olu skutermáđijat leat gitta guohtundili dihte ja dalle sáhttet  olbmot beahthallat go eai beasa skutertuvrraide ja čálligohtet vaši ealáhusa ja boazosámiid vuostá.

Bartagielddus

Runas Myrnes Balto čilge ahte son lea maid lohkan muhtin báikkálaš Facebook siiddus digaštallama dan bartagildosa birra go olbmot eai beasa vuolgit barttaide olggobealde dan gieldda gosa leat registrerejuvvon ássat.  Muhto boazobargiide ja boazoealáhussii ii guoskka dat gielddus go leat ealáhusbargit. 

– Muhto lean oaidnán ahte olbmot leat jearran buktet go sii njoammudávdda. Dieđusge olbmot ballet muhto lea maid deaŧalaš ahte olbmot čájehit solidaritehta boazosámiide ja sin dillái, dadjá son. 

Gielddat sáhttet veahkehit

Norgga Sámiid Riikkasearvi ávžžuha maid gielddaid rávvet ja juohkit dieđuid dan jagáš dili birra boazoealáhusas vai diehtojuohkin lassána. 

– Gielddat sáhttet maid rávvet olbmuid čájehit verddevuođa ja hállat dan birra ahte lea álo  deaŧalaš čájehit áddejumi muhto erenoamážit dan jagi. Doaibmabijut leat biddjon vai mii buohkat sáhttit veahkehit boazodoalu dán heahtedilis dadjá Myrnes Balto. 

Stuora noađđi

NSR stivrrajođiheaddji Runas Myrnes Balto sávvá ahte boazosámit eai bala vuolgimis geasseorohagaide ja barttaide dán giđa.

– Ii berre leahkit nu ahte ealáhusolbmot galget ballat. Muhto lea deaŧalaš muittuhit eará olbmuide mot dilli lea vai buohkat áddejit ja eai čálaš sosiála mediain negatiiva áššiid ealáhusa birra. Boazodoalus ja nuorra boazobargiin lea dal juo stuora noađđi guoddit. 

– Dat lea earenomáš hearkkes dilli ja sáhttá leahkit lossat ja unohas lohkat vel negatiiva áššiid sosiála mediain. 

- Advertisement -
-Almmuhus-