Luosnjárgalaš Jan Eivind Guttorm lea fasken 21,0 kilosaš luosa, ja dat lea dat stuorámus luossa mii lea dieđihuvvon Deanu čázádagas.
Luosnjárgalaš Jan Eivind Guttorm lea fasken 21,0 kilosaš luosa, ja dat lea dat stuorámus luossa mii lea dieđihuvvon Deanu čázádagas.
Jan Eivind Guttorm Luosnjárggas Deanus lei álgo suoidnemánu fatnasin uštimin go fidnii 21,0 kilosaš luosa. Su luossa lea stuorámus ja losimus luossa mii lea dán rádjai dieđihuvvon Deanu Čázádaga guolástanhálddahussii.
Gievrras luossa
Jan Eivind Guttorm muitala son lei okto uštimin go darvánii luosa vuggii Luosnjárgga bajábealde.
– Mun ledjen okto fatnasin suhkamin bajábeale Luosnjárgga go luossa dohppii, ja mun ádjánin guhká ovdal fidnejin luosa fatnasii. Mun bargen beannot diimmu ovdal go ožžon luosa fatnasii. Mun fertejin čohkkedit luosa ala vai ii njuike eret fatnasis, dat gal lei nu issoras gievra,
dadjá luossabivdi Jan Eivind Guttorm.
Somá go su luossa lea stuorámus
Jan Eivind Guttorm lohká lea somá go su luossa lea dat stuorámus dieđihuvvon luossa Deanu čázádagas.
– Lea hui somá gullat ahte mus lea dat stuorámus luossa mii lea dieđihuvvon, muhto lean gullan ahte doppe leat nuppe bealde Deanus earát geat leat ožžon stuorát luosa. Muhto lea somá go lean dat geas lea stuorámus dieđihuvvon luossa Norgga bealde Deanu dán rádjái, dadjá Guttorm.
Maŋŋit dieđihit
Deanu Čázádaga guolástanhálddahusa ráđđeaddi Narve Stubbraaten Johansen lohká lea beare árrat geahččat daid loguid go olbmot eai dieđit sisa luossabivdologuid ovdal čavččabeallai.
– Diibmá eai mis gárvánan bivdologut ovdal juovllaidáigge ja mun sávan dán jagi mis gárvánit logut ollu árabut. Muhtun olbmot vurdet dieđiheamis bivdologuid dassái bivdu lea nohkan, ja danne lea nu váttis dadjat šaddá go Guttorma luossa dat stuorámus luossa dán jagi, dadjá Čázádaga guolástanhálddahusa ráđđeaddi Narve Stubbraaten Johansen.
Buorre luossajahki
Deanu Čázádaga guolástanhálddahusa ráđđeaddi lohká ahte lea buorre luossajahki.
– Lean gullan leat buorre, stuora luossajohtu dán jagi ja šaddá gelddolaš geahččat dán jagáš bivdologuin mii lea dán jagáš stuorámus luossa. Dan eat beasa oaidnit ovdal go ovdal go bivdit leat dieđihan iežaset bivdologuid ja go bivdologut leat válbmasat,
dadjá Ráđđeaddi Narve Stubbraaten Johansen Deanu Čázádaga guolástanhálddahusas.
