– Dát lei oba somá, dajai Rolf Degerlund go Ávvir buvttii sutnje giissá maŋŋel vuorbádeami.
Beaivvi ovdal dan gullon valentiidnabeaivvi, vuorbáduvvui Ávvira instagrámma govvagilvvu vuoiti.
Vuoitu lea giisá, ja vuorbáduvvui buohkaid gaskkas geat juhke gova instagrámmii mas lea #avvir10 gilkor.
Beaivváš Sámi Našunálateáhtera direktevra, Rolf Degerlund, finai Ávvira rabasbeaivvi doaluin Guovdageainnus, ja searvvai maid Ávvira gilvvuide. Dan son ii gáđa go son vuittii áibbas ođđa giissá.
– Giittos eatnat! Dá lei oba fiinna vuoitu, logai son movttegit go Ávvir buvttii giissá sutnje. Stuora oassi teáhtera bargiin čoagganedje geahččat go sin hoavda oaččui giissáža.
– Dál ii leat go deavdigoahtit giissá, árvalit bargit ja geažuhit heajaid dál vuordigoahtit lagamus áiggi, go giissá vuittii. Degerlundas lea moarsi geainna orru ovttas, ja leaba lohpádallan. Ja dál beassá čoaggigoahtit gihliid giisái.
Quiz-gilvu
Ávviris ledje maiddái jearaldagat maid rabas beaivvi guossit sáhtte vástidit. Sii geat vástidedje buot gažaldagaid riekta, ledje mielde fláxavurbbiid ja Ávvira buffa vuorbádeamis. Golmmas vuite Kárášjoga gussiin ja golmmas Guovdageainnu gussiin.
Quiz-vuoitit leat:
Sebastian Aslaksen
Laila S Hegge
Karl Edvard Balto
Brita Triumf
Anne Marie Turi
Rolf Degerlund
«Galle aviissa leat almmuhan» – gilvu
Goalmmát gilvvus galggai árvalit galle Ávvir aviissa leat almmuhuvvon dan rájes go Ávvir álggahuvvui, dan logi jagis go lea doaibman guovvamánu 6. beaivvi 2008 rájes gitta guovvamánu 6. beaivvi 2018 rádjái. Ávvir ilbmagođii golmma geardde vahkkus, ja borgemánus 2008:s ilbmagođii viđa geardde vahkkus. Ledje golmmas geat vástidedje lagamusat rievttes vástádusa, ja 14 aviisanummára earuhedje rievttes vástádusa mii lei 2430 aviissa. Son gii vuorbáduvvui vuoitit fláxavuorbbi, lea Ragnhild Bæhr Lango.