-Almmuhus-
-Almmuhus-
-Almmuhus-
OĐĐASAT– Dán eat leat vásihan ovdal

– Dán eat leat vásihan ovdal

-

-

Justiisaministtar Anders Anundsen lohká dan báhtareaddjirávnnji man dál vásihit Nuorta-Finnmárkkus, leat dakkárin man eai leat vásihan ovdal. Danne lea son odne gohččun eiseválddiid jođánit sáddet olggos sin geain ii leat duohta dorvodárbu.

– Mun lean dáppe go mii leat dan dilis mas bohtet hirpmástuhtti olu dorvoohccit rájá rastá Ruoššas Storskogii. Mii oaidnit de dárbbu gieđahallat dán eará ládje go ovdal, lohká Justiisa- ja gearggusvuođaministtar Anders Anundsen.

 

Anundsen odne galleda Nuorta-Finnmárkku gos earret eará finai Vestleirenis gosa eiseválddit leat ásaheamen dorvoohcciid vuostáiváldinguovddáža. Norggas gávdno dál dušše okta dákkár guovddáš, dat lea Rådes Østfoldas.

Dát guovddáš galgá vuosáiváldit dorvoohcciid, registrerehit sin ja čađahit dearvvašvuođaiskosiid, ovdal go dorvoohccit sáddejuvvojit viidáseappot asylavuostáiváldinguovddážiidda.

 

– Dramáhtalaččat lassánan

Dál bohtet beaivválaččat lagabui čuođi dorvoohcci Ruošša bokte Nuorta-Finnmárkui. Ovdalaš jagiid leat dán rájá rasttildan gaskkal 0 ja 20 dorvoohcci jahkásaččat, dát govve bures mo dilli lea rievdan maŋimuš mánuid.

– Dál go logut leat dramáhtalaččat lassánan de leat buot etáhtat ovttasbargagoahtán ásahit dán vuostáiváldinguovddáža gos dál leat, sihkkarastin dihte ahte guovddáš nagoda gieđahallat ja meannudit daid dorvoohcciid mat bohtet rájá rastá Norgii, lohká Anundsen.

 

20-30 proseantta eai dárbbaš dorvvu Norggas

Iežas mátkkis almmuhii ministtar maiddái ahte odne sáddejit ođđa instruksa UDI:i man mielde eiseválddit galget vuoruhit jođánit sáddet dorvoohcciid olggos Norggas, jus dáin ii leat duohta dorvodárbu.

Ministtar muitala iežaset loguid čájehit ahte gaskkal 20 ja 30 proseantta dorvoohcciin geat bohtet Norgii, lea jo buorre ja dorvvolaš ássanlohpi eará riikkain nu mo Ruoššas.

– Dát lea oalle stuorra oassi dorvoohcciin, nu ahte sii geain ii leat dárbu oažžut dorvvu Norggas galget jođánit sáddejuvvot fas olggos riikkas. Dát olbmot geat bohtet vaikke leat jo ožžon ássanlobi eará riikkain, leat noađđin min asylavuogádahkii, danne lea dehálaš sin jođánit sáddet fas olggos, čilge Anundsen.

 

24 ođđa virggi

Dál go Nuorta-Finnmárku vásiha dákkár báhtareaddjirávnnji de leat eiseválddit šaddan ásahit maiddái 24 ođđa politiijavirggi Nuorta-Finnmárkku politiijaguvlui.

– Politiijain eai leat leamaš návccat gieđahallat dán maid dál vásihat. Mii leat ásahan dáid virggiid sihkkarastin dihte ahte nagodat gieđahallat dan dili mas dál leat gos galgat registreret ja meannudit dorvoohcciid, dás leat maid váikkuhusat dasa man jođánit nagodat sáddet sin geat eai galgga oažžut dorvvu Norggas, fas Ruššii dahje eará riikkaide, čilge Anundsen.

 

-Almmuhus-