Vuosttaš lohkamat duođaštit ahte leat gaskkal 66 ja 73 gumppe Norggas.
Vaikko lea leamaš unnán muohta ja nu váttis guorrat gumppiid, de leat vuosttaš lohkamat duođaštan ahte leat gaskkal 42 ja 47 gumppe mat leat dušše Norgga bealde riikkaráji, 13 gumppe leat sihke Norgga ja Ruoŧa bealde ja dasa lassin leat vel gaskkal 11 ja 13 gumppe maid lohkkit eai leat vel áibbas sihkkarat gosa gullet.
Lea Høgskolen i Innlandet mii čađaha gumpelohkamiid Rovdata ovddas ja leat bargan kártenbargguid golggotmánu vuosttaš beaivvis gitta juovlamánu logát beaivái. Kártenbarggut bistet gitta njukčamánu 31. beaivvi rádjai.
– Dán rádjai leat duođaštan vielpáid njealji gumppevalvvis mat gullet Ulvåa, Hornmoen, Kynna ja Mangen guovlluide, mat leat gumpeavádaga siskkobealde. Dasa lassin leat duođaštuvvon vielpát Varåa, Boksjø ja Juvberget guovlluin, mat leat sihke Norgga ja Ruoŧa bealde riikkaráji, čilge Rovdata jođiheaddji Jonas Kindberg preassadieđáhusas.
Eanas gumppet dán rádjai leat duođaštuvvon Innlandet ja Viken fylkkain.
